ئاگرێک لە گوندی بێورێی شارباژێڕ کەوتووەتەوە

964+

پیشەوا محەمەد

لە سەرلەبەیانیی ئەمڕۆوە ئاگرێک لە گوندی بێورێی شارباژێڕ کەوتووەتەوە و دانیشتوانەکەی داوای هاوکاری دەکەن.

ئاگرەکە لە شاخی شەڕگە کەوتووەتەوە و بەرەو گوندی گۆمڵێ و رەشەکانی پەرەی سەندووە.

ئەو ناوچەیەی گڕی گرتووە دارستان و پاوان و رەز و باخی خەڵکیشی لێیە.

حامید عەبدوڵا، ئەندامی دەستەی راوێژکاری گوندی بێورێ بە 964ـی راگەیاند، شوێنی ئاگرەکە سەختە و کۆنتڕۆڵکردنی ئاسان نییە، بۆیە داوای هاوکاری دەکات بۆ کۆنتڕۆڵکردنی ئاگرەکەیان.

لە ماوەی 10 رۆژی رابردوودا ئەمە سێیەم ئاگرکەوتنەوەیە لە شارباژێڕ روو دەدات و سەدان دۆنم دارستان و پاوان و دەغڵودان سوتاون.

“ئێستا دانیشتوانی گوندەکانی دەوروبەرمان هاتوونەتە هاوکاریمان و تکامان وایە لایەنە پەیوەندیدارەکان بێن بۆ کۆنتڕۆڵکردنی ئاگرەکە”، ئەوەش قسەی حامید عەبدوڵایە.

بێورێ کەوتووەتە ناحیەی سیوەیلی قەزای شارباژێڕ لە پارێزگای سلێمانی.