لیستی موچەی سەرجەم وەزارەتەکان بڵاوکرایەوە

ژووری هەواڵ

وەزارەتی دارایی لیستی موچەی سەرجەم وەزارەتەکانی بڵاوکردەوە بۆ مانگی ئایاری 2023.

بەگوێرەی بڵاوکراوەکە تاوەکو 27.6.2023، کە رۆژێک بەر لە جەژنی قوربان دەکات، موچەی سەرجەم وەزارەت و فەرمانگەکانی حکومەتی هەرێمی کوردستان دابەشدەکرێت.

زیاتر لە سێ مانگە هەناردەی نەوتی کوردستان بۆ دەرەوە راگیراوە و هێشتا دەستیپێنەکردووەتەوە.

لەو چەند مانگەدا، حکومەتی هەرێم بە قسەی خۆی لە رێگەی داهاتی ناوخۆ و ئەو پارەیەی جار جار لە حکومەتی بەغداوە بۆی دێت موچەی دابەشکردووە.

ئەم موچەیەی دابەشدەکرێت بۆ مانگی ئایار دەگەڕێتەوە، بەو شێوەیەش حکومەت یەک مانگ لە پێدانی موچەی فەرمانبەرەکانی دواکەوتووە.

بڕیارە بەمزوانە هەناردەی نەوتی کوردستان دەستپێبکاتەوە و رێکەوتنەکانی هەولێر و بەغدا و بودجەی فیدراڵی بچنە بواری جێبەجێکردن، بەرپرسانی حکومەتی هەرێم گەشبینن کە بەو هەنگاوانە گرفتی دواکەوتنی موچە نەمێنێت.