هێلیکۆپتەرێکی ئەمریکی تێکشکا و 22 سەرباز برینداربوون

964+

هاوبەش ئەبوبەکر

فەرماندەیی ناوەندیی سوپای ئەمریکا کەوتنەخوارەوەی ھێلیکۆپتەرێکی ھێزەکانیان لە رۆژئاوای کوردستان راگەیاند و دەڵێت، بەو هۆیەوە 22 سەربازی ئەمریکی برینداربوون.

لە پۆستێکی تویتەردا، ئەمڕۆ سێشەممە، فەرماندەیی ناوەندیی سوپای ئەمریکا دەڵێت، لەئێستادا لێکۆڵینەوە لە ھۆکاری رووداوەکە دەکەن و ھیچ ئاماژەیەکیش نییە کە ھێلیکۆپتەرەکە رووبەڕووی ھێرشی دوژمنکارانە بووبێتەوە.

دەشڵێت، هێلیکۆپتەرەکە رۆژی شەممە کەوتووەتەخوارەوە و برینی 10 سەربازیان سەختە و خراونەتە بەشی چاودێری چڕ.

ئەمریکا نزیکەی 900 سەرباز و راوێژکاری لە رۆژئاوای کوردستان و سوریا هەیە و واشنتن دەڵێت، ئەمە لە چوارچێوەی ئەرکێکدایە بۆ لەنێوبردنی پاشماوەکانی داعش.

لە مانگی ئازاریشدا، 25 سەرباز و راوێژکاری ئەمریکی لە شەڕی رووبەڕووبوونەوەی چەکدارانی داعش برینداربوون و راوێژکارێکی ئەو وڵاتەش کوژراوە.