964+
هێمن بەکر – هەولێر
بەهۆی تەم و مژی چڕەوە لە ئاسمانی شارەکە، گەشتەکانی فڕۆکەخانەی نێودەوڵەتی هەولێر تاوەکو کاتژمێر ١٢ی نیوەڕۆی ئەمڕۆ دووشەممە رادەگیرێن، بە قسەی بەرپرسان.
ئەحمەد هۆشیار، بەڕێوەبەری فڕۆکەخانەی نێودەوڵەتی هەولێر بە 964+ی وت، لە بەرەبەیانی ئەمڕۆوە تاوەکو ئێستا شەش گەشتیان دواکەوتووە.
وتیشی، “لەپێناو سەلامەتی گەشتیاران گەشتەکان دوادەخەین، لە کاتژمێر ١٢ دەست پێدەکەینەوە”.
964+ دەزانێت فڕۆکەخانەی نێودەوڵەتی سلێمانی بە بێ گرفت گەشتەکانی خۆی بەڕێکردووە، چەند فڕۆکەیەکیش کە بڕیاربووە لە فڕۆکەخانەی هەولێر بنیشنەوە، رەوانەی ئەوێ کراون و لە سلێمانی نیشتوونەتەوە.
لە لایەکی دیکە، دوێنێ، بەڕێوەبەرایەتی فڕۆکەخانەی نێودەوڵەتی بەغدا، هەر بەهۆی تەم و مژەوە، گەشتەکانی راگرت تاوەکو سەرلەبەیانی ئەمڕۆ دووشەممە.
