دیمهنێك له یاریی هه‌ولێر و شوڕته...فۆتۆ: راگهیاندنی یانه‌ی هه‌ولێر
هه‌ولێر تامی یه‌كه‌م بردنه‌وه‌ی له‌م وه‌رزه كرد
+964
ئه‌رسه‌لان عه‌بدوڵا – هه‌ولێر
له یارییه‌كی به‌هێزدا یانه‌ی هه‌ولێر له یانه‌ی شوڕته‌ی پاڵه‌وانی وه‌رزی رابردووی خولی نایابی عێراقی برده‌وه، ئه‌مه‌ش یه‌كه‌م بردنه‌وه‌ی هه‌ولێر بوو له‌م وه‌رزه‌دا.
له گه‌ڕی شه‌شه‌می خولی نایابی عێراق، یانه‌ی هه‌ولێر له كه‌شێكی باراناوی و سارددا، له یاریگه‌ی خۆیدا تامی یه‌كه‌م بردنه‌وه‌ی له‌م وه‌رزه‌ی خولی نایابی عێراقدا كرد، دوای ئه‌وه‌ی به ئه‌نجامی گۆڵێكی بێ به‌رامبه‌ر له یانه‌ی شوڕته‌ی برده‌وه.
یارییه‌كه ئێواره‌ی هه‌ینی كرا و تاكه گۆڵی یارییه‌كه‌ش بۆ هه‌ولێر، محه‌مه‌د حه‌سه‌ن مه‌كینزی له خوله‌كی ٧٤ به لێدانی سزا تۆماری كرد.
له یارییه‌كه‌دا هه‌رچه‌نده بارانێكی به‌خوڕ ده‌باری، به‌ڵام جه‌ماوه‌رێكی به‌رچاوی یانه‌ی هه‌ولێر بۆهاندانی تیپه‌كه‌یان، له یاریگه ئاماده‌بوون.
“بارانێكی به‌خوڕ ده‌باری، به‌ڵام جه‌ماوه‌رێكی به‌رچاوی یانه‌ی هه‌ولێر بۆهاندانی تیپه‌كه‌یان، له یاریگه ئاماده‌بوون”
هه‌ولێر له پێنج یاریی رابردوودا، سێ دۆڕان و دوو یه‌كسانبوونی هه‌بوو، به‌ڵام ئه‌مه یه‌كه‌م بردنه‌وه‌ی بوو له‌م وه‌رزه‌ی خولی نایابی عێراقدا، ئێستا تیپه‌كه پێنج خاڵی هه‌یه.
هاوكات جێی سه‌رنج بوو راهێنه‌ری یانه‌ی هه‌ولێر غازی فه‌هد، پێنج یاریزانی تیپه‌كه‌ی پێش یارییه‌كه دوورخسته‌وه و رایگه‌یاند، له قۆناغی ئێستا پێویستی پێیان نییه، ئه‌وانیش یاریزانان “ئیبراهیم لالی، نیاز محه‌مه‌د، دانا عوسمان، كۆسره‌ت باییز و حه‌سه‌ن چه‌لوب”.
خولی نایابی عێراق دوای وه‌ستانی مانگێك، پێنجشه‌ممه‌ی رابردوو له گه‌ڕی شه‌شه‌مه‌وه ده‌ستیپێكرده‌وه، ئه‌مه‌ش له كاتێكدا ئێستا له زۆربه‌ی وڵاتانی دنیا به‌هۆی به‌ڕێوه‌چوونی مۆندیاله‌وه خوله ناوخۆییه‌كان وه‌ستاون.
خولی نایابی عێراق به به‌شداریی ٢٠ یانه به‌ڕێوه‌ده‌چێت، كه چوار یانه‌یان له هه‌رێمی كوردستانه‌وه به‌شدارن.