چاندنی گوڵەکان لە بەربەستی ناوەڕاستی شەقامی 60 مەتری سلێمانی. وێنە: 964+
پارکی ئازادی و 60 مەتریی سلێمانی بە 25 هەزار گوڵ دەڕازێندرێنەوە
964+
هاوبەش ئەبوبەکر
بەڕێوەبەرایەتیى باخچەکانى سلێمانى هەڵمەتێکی بۆ رازاندنەوەی شەقامەکانی شارەکە و پارکی ئازادی راگەیاندووە، بڕیارە تەنیا لە بەربەستی ناوەڕاستی شەقامەکان 15 هەزار گوڵی هەمیشە سەوز بچێنرێن.
بەهرۆز سالار، بەڕێوەبەری باخچەکانی سلێمانی بە 964ی راگەیاند، هەڵمەتەکە دوێنێ سێشەممە دەستیپێکردووە و لە یەکەم رۆژدا زیاتر لە یەک هەزار گوڵ لە شەقامی 60 مەتریی سلێمانی روێندراون.
جگە لە شەقامی 60 مەتری، لە پارکی ئازادیش 10 هەزار گوڵی دیکە دەچێنرێن و بە سیستمێکی رێکخراوی ئاودێری ئاو دەدرێن.
هەموو گوڵەکان لە جۆری “بەیبی رۆز”ـن بە رەنگی جیاواز، بۆ هەر چوار وەرزی ساڵ سەوزن و وشک نابن، بەڕێوەبەری باخچەکانی سلێمانی وای وت.
کاری چاندنی گوڵەکان لەلایەن “کۆمپانیای جوان” جێبەجێ دەکرێت و بە تەندەر بۆی دەرچووە، لە بەرامبەردا نزیکەی یەک ملیار دیناری پێدەدرێت.