جووتیاران لە دەردەسەرییەک نەجاتیان دەبێت

964+

پێشەوا محەمەد – سلێمانی

لەمەودوا جووتیاران دەتوانن لە نزیکترین بنکە پشکنین و نوێکردنەوەی ساڵیانە بۆ ئۆتۆمبێلە کشتوکاڵییەکانیان بکەن بێگوێدانە ئەوەی تابلۆکەی سەر بە کام پارێزگایەیە، بڕیارەکە هی وەزارەتی ناوخۆیە.

مانگی شوباتی ئەمساڵ وەزارەتی کشتوکاڵ و سەرچاوەکانی ئاو داوا لە وەزارەتی ناوخۆ دەکات، ئاسانکاری بۆ ئامێرە کشتوکاڵییەکانی جووتیاران بکات. لە مانگی نیساندا وەزارەتی ناوخۆ وەڵام دەداتەوە و رەزامەندی دەدات.

بە پێی بڕیارەکەی وەزارەتی ناوخۆ، کە لە 5.4.2023 دەرکراوە، جووتیاران دەتوانن پشکنینی ئۆتۆمبێلەکانی وەک تراکتۆر، دەڕاسە و حەفارە لە نزیکترین بنکە لێیانەوە بکەن و ساڵیانەکانیان نوێ بکەنەوە، جا سەر بە هەر پارێزگایەک بن.

هەر بە پێی بڕیارەکە، دواتر پەڕاوەکانی ئۆتۆمبێلەکە بە پۆستەی فەرمی رەوانەی هاتوچۆی ئەو شوێنە دەکرێت، کە ئۆتۆمبێلەکەی لێ تۆمار کراوە.