مێرووی سن لە راپەڕین بڵاوبووەتەوە

964+

مەجید بتوێنی – بنگرد

مێرووی سن لە ناو گەنمی جووتیارانی دەشتی بەری مەرگە لە ناحیەی بنگردی سەر بە قەزای دوکان بڵاو بووەتەوە.

زاهیر عەبدوڵا لێپرسراوی پاراستنی رووەک لە بەشی کشتوکاڵی بنگرد بە 964ی راگەیاند، لیژنەکەیان رووپێوی گەنمی سنورەکەیان کردووە، دەرکەوتووە  سن بڵاو بووەتەوە لە قۆناغی جووت بوون و گەراداناندایە.

وتیشی، بڕی 300 لیتر دەرمانی قڕکەریان بۆ هاتووە بیدەن بە جوتیاران بەڵام بەشی 2% جووتیاران ناکات.

عەبدوڵا بابەکر، لە قەرەتەپە ومەمەنداوا بۆ ئەمساڵ 100 دۆنم زەوی بەگەنم داچاندووە ئەو جوتیارە بە 964ی وت، ” ئەگەر بیەوێت مێرولەی سن لە ناو گەنمەکەی لە ناوببات پێویستی بە زیاتر لە 100 لیتر دەرمانی قڕکەر هەیە دەبێت لەسەر ئەرکی خۆی بیکڕێت، داواکاریشی ئەوەیە   ئاوڕ لە جوتیاران بدرێتەوە بە دابینکردنی درمان و پەین و پێداویستییە کشتوکاڵییەکان.

لەو بارەیەوە رەشید خدر، ئەندازیاری کشتوکاڵ بە 964ی ی وت، هەڵکەوتەی جوگرافی ناوچەکە وایە بە چیا دەورە دراوە، چیاکانیش ماڵی مێرولەی سنن لەم وەرزەدا دادەبەزن بۆ ناو گەنمەکان .

رونیشی کردەوە ” ئێستا رێژەیان کەمە وکۆنتڕۆڵ کردنی ئاسانترە، ئەگەر بەتیمی فراوان یان فڕۆکەی کشتوکاڵی سەرجەم دەشتەکە بە دەرمانی قڕکەر نەڕشێت و پێشی لێ نەگیرێت، بەهۆی گۆڕانی کەش وهەوا و گونجاوی ژینگە ئەگەری هەیە ئەمساڵ دووجار سنەکان زاوزێ بکەن ئەوکات  ئافاتی سن  دروست دەبێت و زیان بە جوتیاران دەگات.

بەپێی ئامارێکی بەشی کشتوکاڵی بنگرد بۆ ئەمساڵ 45 هەزار دۆنم زەوی بە گەنم داچێندراوە، لە سنورەکە زیاتر لە چوار هەزار جوتیار هەن.

پێداچوونەوە: توانا نەقی