سیستمی غاز لە نێوان حکومەت و کۆمپانیاکان

964+ هێمن بەکر – هەولێر بە فەرمانی سەرۆک وەزیران کارکردن لە سیستمی غاز راگیرا، هاوڵاتیان نیگەرانن لە رووداوەکان، کۆمپانیایەکی بوارەکە دەڵێت، “تاوانی ئێمە نییە، نەشارەزایی وەستاکان هۆکاری تەقینەوەکانە”. شەوی رابردوو، تانکییەکی غاز لە بەشە ناوخۆییەکدا لە دهۆک تەقییەوە، بووە هۆی گیان لەدەستدانی پێنج کەس و زیاتر لە ٣٠ کەسی دیکە بریندار بوون، ئەمە جگە لە رووداوەکەی ١٧ی ئەم مانگە لە سلێمانی، کە ١٥ کەس گیانیان لەدەستدا و ١٢ی دیکە برینداربوون. درەنگانی شەوی رابردوو، مەسرور بارزانی، سەرۆک وەزیرانی هەرێمی کوردستان تەلەفۆنی بۆ ئومێد خۆشناو، پارێزگاری هەولێر کردووە، پێی وتووە، “بەپەلە کارکردن بە سیستمی غاز رابگرن”. 964+ دەزانێت، ئەو بڕیارەی سەرۆک وەزیران گشتییە و هەموو پارێزگاکان دەگرێتەوە، لە ئێستادا قائیمقامیەتی سلێمانی لە کۆبوونەوەدایە بۆ گرتنەبەری رێکارەکان. بەپێی زانیارییەکان دانانی سیستمی غاز بۆ ماڵان و بازاڕ و کۆمپانیاکان رادەگیرێت تاوەکو پێداچوونەوە و وردبینی دەکرێت بۆ پرۆسەکە.

“لایەنە پەیوەندیدارەکان زانستییانە لێکۆڵینەوەیان نەکردووە لە هۆکاری تەقینەوەکان” خاوەن کۆمپانیای غازی شل

خاوەنی کۆمپانیایەکی ناسراوی بواری دانانی سیستمی غاز لە سلێمانی کە پێی خۆش نەبوو ناوی بنوسرێت قسەی بۆ 964+ کرد، وتی، “لایەنە پەیوەندیدارەکان زانستییانە لێکۆڵینەوەیان نەکردووە لە هۆکاری تەقینەوەکان”. ئەو خەتاکەی خستە سەر بەشێک لە وەستاکانی غازی شل، بەوەی گوایە رێپێدراو نین و لە خۆیانەوە دەستکاری سیستمەکە دەکەن، وتیشی ئەوان وەکو کۆمپانیایەکی فەرمی، لە ٢٠١٢ تاوەکو ئێستا کار لەو بوارە دەکەن و “هیچ کارەساتێکیش رووینەداوە”. ئەو خاوەن کۆمپانیایە نمونەی بە تانکی ماڵەکەی سلێمانی هێنایەوە، کە سەرەڕای تەقینەوەی خانووەکە، تانکییەکە سەلامەت دەرچووە، وتی “ئەوە یانی سیستمەکە کێشەی نەبووە، تانکییەکە ستاندارد بووە، بەڵام ئەوەی دەستکاری کردووە شارەزا نەبووە”. بە سۆراغی 964+، لە هەرێمی کوردستان زیاتر لە ٥٠ کۆمپانیای فەرمی و زیاتر لە ٥٠ شوێنی دیکەی نافەرمی هەن کار لەسەر دانانی سیستمی غاز دەکەن. بە راگرتنی ئیش و کارەکانیان، زیانی ملیۆن دۆلاری بەر هەندێکیان دەکەوێت، بەگوێرەی ئەو کۆمپانیایەی 964+ قسەی لەگەڵ کرد.