شەقامێکی شاری موسڵ. وێنە: 964
لە موسڵ بەنزینە هەرزانەکە دەستناکەوێت
964+
زەید کۆچەر
ئەمڕۆ لە موسڵ بەنزینە هەرزانەکە دابەشناکرێت، چونکە کێشە لە سیستمی ئەلیکترۆنی خوێندنەوەی کۆبۆن هەیە.
بەگوێرەی زانیارییەکانی 964، بۆ ئەمڕۆ سێشەممە لە شاری موسڵ رێگە نەدراوە شۆفێرەکان بەنزین تێبکەن و دەرگای سەرجەم بەنزینخانەکان داخراون.
کارمەندێکی لقی موسڵی کۆمپانیای دابەشکردنی بەرهەمە نەوتییەکان بۆ 964ی پشتڕاستکردەوە، چەند کاتژمێرێکە کێشە لە کۆبۆنی بەنزیندا هەیە و جیهازەکان نایخوێننەوە، وتیشی لە هەوڵی چارەسەرکردنیدان.
بەشێک لە هاوڵاتیانی پارێزگای دهۆک بە مەبەستی کڕینی بەنزینی هەرزان (لیتری 450 دینار) دەچنە پارێزگای نەینەوا و بە تایبەتی شاری موسڵ.
دڵشاد گۆران خەڵکی قەزای بەردەڕەشە لە پارێزگای دهۆک، ئەو ئەمڕۆ سێ کاتژمێر لە سەرەی بەنزیندا ماوەتەوە و هێشتا وەرینەگرتووە.
“دوای ئەو ماوە زۆرە لە چاوەڕوانی لە موسڵ گەڕامەوە، چونکە بەنزینخانەکان داخراون”، دڵشاد وای وت.