964+
دیلان محەمەد – سلێمانی
سەرلەبەیانی ئەمڕۆ غازی فرمێسکڕێژ هەڵدراوەتە ناو قوتابخانەیەکی بنەڕەتی لە سلێمانی، بەهۆیەوە نزیکەی ١٠٠ منداڵ توشی هەناسەتەنگی و ترس و دڵەڕاوکێ هاتوون.
پۆلیسی چالاکییە مەدەنییەکان غازەکەی هەڵداوە، لە کاتی بڵاوپێکردنی خۆپیشاندانی خوێندکارانی زانکۆی سلێمانی.
سەرکەوت ئەحمەد، وتەبێژی پۆلیسی سلێمانی بە 964+ی راگەیاند، پۆلیسەکان بە هەڵە غازی فرمێسکڕێژیان هەڵداوەتە ناو قوتابخانەی دیاری بنەڕەتی لە گەڕەکی شەکرەکە کە دە کەوێتە بەرامبەر باڵەخانەی پارێزگای سلێمانی.
هاوکات، سامان نادر، بەڕێوەبەری سەنتەری فریاکەوتنی خێرای سلێمانی بە 964+ی وت، بەهۆی رووداوەکەوە نزیک بە ١٠٠ خوێندکاری منداڵ تووشی بێ هۆشی و هەناسەتەنگی و چاوکزانەوە و ترس و دڵەڕاوکێ هاتوون.
بە قسەی سامان نادر، تیمەکانیان بە ئەمبوڵانس چوون بە ھانای منداڵەکانەوە و سەرجەمیان چارەسەرکردوون و رەوانەی ماڵەوەیان کردوونەتەوە.
