خواردن دەفرۆشن و داهاتەکەی بۆ کاری خێرخوازییە

مامۆستایان و قوتابیانی کۆمەڵگەی بەریتانی لە خەمی نەخۆشخانەی هیوادان

دیلان محەمەدجەزا – سلێمانی

لە کۆمەڵگەی بەریتانی نێودەوڵەتی لە شاری سلێمانی فێستیڤاڵێک سازکراوە و داهاتی فێستیڤاڵەکەش بۆ کاری خێرخوازی و نەخۆشخانەی هیوایە.

مامۆستایان و قوتابیانی کۆمەڵگەکە لە ماڵەوە خواردنیان لێناوە و لە چەندین کوخ و کەپری جواندا خواردنەکانیان نمایش کردووە.

دانەر رەشید سەرپەرشتیاری فێستیڤاڵەکە بە 964ـی وت، “ساڵانە لەم رۆژەدا ئەم چالاکییە بۆ قوتابییەکانمان ساز دەکەین بۆ ئەوەی پەرە بە رۆحیەتی پێکەوبوون و هاوسۆزی کۆمەڵایەتی لە نێوانیان بدەین”.

“نزیکەی 300 پڕۆژەمان هەیە و قوتابییەکانمان لە ماڵەوە کۆمەڵێک خواردن و شتی جۆراوجۆریان هێناوە و لێرە دەیفرۆشنەوە و داهاتەکەی دەبەخشرێت بە نەخۆشخانەی هیوا و خانەی بێسەرپەرشتان”، دانەر رەشید وادەڵێت.

ئاماژەی بەوەشکرد، پارساڵ لەم رۆژەدا 47 ملیۆن دینار کۆکراوەتەوە و چەند ئامێرێکیش بۆ نەخۆشخانەی هیوا کڕدراون بۆ ئەوەی لە نەخۆشخانەکە سوودیان لێ وەربگیرێت.

پێداچوونەوە؛ شۆڕش قادری