وێنەی مەسرور بارزانی، سەرۆكی حكومەتی هەرێمی كوردستان - وێنە: KRG
"نازانم لەچى دەترین"
مەسرور بارزانی داوا دەکات پەرلەمان کارا بکرێتەوە و حکومەت پێکبهێنرێت
964+
وریا فەتاح
مەسرور بارزانی، سەرۆکی حکومەتی هەرێمی کوردستان، رەخنەی توند لەو لایەن و پەرلەمانتارانە دەگرێت کە بەشداری دانیشتنەکان ناکەن، و بە “راکردن لە بەرپرسیارێتی” وەسفی دەکات، هاوکات داوا دەکات چیتر کات بۆ پێکهێنانی حکومەت بەفیڕۆ نەدرێت.
لەميانی بەشداریکردنی لە مەراسیمی کردنەوەی پێشانگای تەکنەلۆجیای (های تێکس – HITEX)، مەسرور بارزانی لە لێدوانێکدا بۆ دەزگاکانی راگەیاندن پەیامێکی ئاراستەی پەرلەمانتاران کرد و داواى لێکردن پەرلەمان کارا بکەنەوە. ئەو وتی: “هەست بە بەرپرسیارێتی بکەن و وەفاتان هەبێت بەرامبەر ئەو دەنگانەی پێتان دراوە.”
سەرۆکی حکومەت ئاماژەی بەوەش کرد، پێویستە نوێنەرانی خەڵک بچنە پەرلەمان و لەوێ گوزارشت لە بۆچوونەکانیان بکەن.
“هیوادارم بچنە پەرلەمان و لەوێ قسەی خۆیان بکەن، من نازانم لە چی دەترسن؟ چونکە هەرچی قسە و رەخنەیەک هەیە دەتوانن لە پەرلەمان بیکەن”، مەسرور بارزانى واى وت.