دەست بەسەر هەنگوینی ماوە بەسەرچوودا گیرا

964+

محەمەد عومەر- هەڵەبجە

لە سەردانیان بۆ هەندێک شیرینی و خانە و کافتریا و مارکێت لیژنەکانی قایمقامیەتی هەڵەبجە دەستی بەسەر بڕێک هەنگوینی ماوە بەسەرچوودا گرت.

ئەمشەو شەممە 26.3.2023، لیژنەکانی قایمقامیەتی قەزای ناوەندی هەڵەبجە دەستیانگرت بەسەر بڕێک خواردن و خواردنەوە و هەنگوینی ماوە بەسەرچوو، هاوکات دوو خاوەن دووکانیش ئاگادار کرانەوە.

لە بەردەوامی گەڕان و پشکنینی لیژنەکانی قایمقامیەتی هەڵەبجە لە مانگی رەمەزاندا بۆ رێگریکردن لەهەر بابەتێکی قەدەغەکراو ماوە بەسەرچوو  سەردانی هەندێک لە شیرینی خانە و کافتریا و مارکێتی کردووە.

لیژنەکە لە پەیجی خۆیان لە فەیسبووک بڵاوی کردووەتەوە کە دەستیان گرتووە بەسەر بڕێک لە هەنگوین و شیرینی ماوە بەسەرچوو کە خاوەن دوکانەکان ویستوویانە ساغی بکەنەوە. بەڵام ئاماژە بە بڕی هەنگوینەکە و سزای دوکاندارەکان نەدراوە.