ئاگرەکەی ملەی سازان دوای نزیکەی چوار کاتژمێر کۆنتڕۆڵکرا

فەرهاد حەسەن

بەرگری شارستانی هەڵەبجە دەڵێت ئەو ئاگرەی ئەمڕۆ لە ملەی سازان کەوتبووەوە توانیویانە بەم ئێوارەیە لەلایەن تیمەکانیانەوە کۆنتڕۆڵی بکەن.

ئاگرەکە لە کاتژمێر 1:00 ی پاشنیوەڕۆ، بەهۆی هەورەبروسکەوە کەوتبوەوە، بەڵام بەهۆی بوونی رەشەبای بەهێزەوە ناوچەکانی ملەی کانی گوێز و گۆڕستانی شێخ مۆمن لە سازان و کەسرەتەی گرتبووەوە و فراوان بوو.

بەرگری شارستانی ئاماژە بەوەدەکات، تیمەکانی ئاگری شاخ کە سەر بە بەڕێوەبەرایەتییەکەیان و بنکەی پیرمحەمەد و تیمی بنکەی هەڵەبجە بە زیاتر لە 45 کارمەند کە بەسەر شەش تیمدا دابەش کرابوون توانیان لە کاتژمێر 5:30ی خولەکی ئێوارە بە تەواوی کۆنتڕۆڵ بکرێت.