زەیدی: موچە مسۆگەرە و یەک ملیۆن پارچە زەوی دابەش دەکەین

ژێوار خدر

عەلی زەیدی، سەرۆکوەزیرانی عێراق لە کۆڕبەندی “دیالۆگی بەغدا” چەند مژدەیەکی بە هاوڵاتیان دا و رایگەیاند، موچەی فەرمانبەران پارێزراوە و بۆ ساڵانی داهاتووش پلانمان هەیە کە هیچ گرفتێکی بۆ دروست نەبێت.

یەکێک لە خاڵە هەرە گرنگەکانی قسەکانی زەیدی، پڕۆژەی دابەشکردنی “یەک ملیۆن پارچە زەوی” بوو بۆ ئەو هاوڵاتییانەی کە هیچ زەوی و خانوویەکیان نییە، وتیشی، لە ماوەی کەمتر لە سێ ساڵدا هەموو ئەو کەسانەی شایستەن، زەوییەکەیان وەردەگرن.

لەبارەی دۆخی سیاسی و ئەمنیشەوە، سەرۆکوەزیران دڵنیایی دا کە هیچ شەڕ و پێکدادانێکی سەربازی لە ئارادا نییە و هەموو لایەنە سیاسییەکان رێککەوتوون کە چەک تەنیا بەدەست حکومەتەوە بێت و کۆتایی بە دیاردەی چەکداری بهێنرێت.

پوختەی گرنگترین قسەکانی سەرۆکوەزیران:

–        موچە دابین کراوە و یەک ملیۆن پارچە زەوی بۆ ئەوانەی خانوویان نییە دابەش دەکرێت.

–        هیچ مەترسییەکی شەڕ نییە و رێگە نادەین دوژمنانی عێراق هەل بقۆزنەوە.

–         بەهۆی رێکخستنەوەی مەسروفاتی سووتەمەنی، نزیکەی 18 تریلیۆن دینار بۆ دەوڵەت گەڕاوەتەوە.

–        بودجەی ساڵی داهاتوو زیاتر بۆ چاککردنی کارەبا و وزەی خۆر تەرخان دەکرێت.

–        دەمانەوێت هەناردەی نەوت زیاد بکەین و جگە لە بەندەری جەیهانی تورکیا، رێگای تر بۆ فرۆشتنی نەوت بدۆزینەوە.

–        جارێکی دیکەی خۆم بۆ سەرۆکوەزیران کاندید ناکەمەوە و ئامانجم تەنیا بنیادنانی ئابوورییەکی بەهێزە.

–        سندوقێک بە بڕی 100 ملیار دۆلار بۆ گەشەپێدان و پشتگیری خەڵکی کاسبکار و کەرتی تایبەت دادەمەزرێنین.