فەردەیەک فاسۆلیا 20 هەزار دیناری چووە سەر

964+

نرخی فەردەیەک فاسۆلیای ئێرانی نزیکەی 20 هەزار دیناری چووەتە سەر، بەڕێوەبەری چاودێری و بازرگانیی سلێمانیش دەڵێت هۆکارەکەی ئەوەیە ئێران بە گران پێمان دەفرۆشێت.

سۆران عەبدولغەفور، بەڕێوەبەری چاودێری و بازرگانیی سلێمانی بە تۆڕی 964ی راگەیاند، ماوەی نزیکەی مانگێکە فەردەیەکی 25 کیلۆیی فاسۆلیای ئێرانی لە 65 هەزار دینارەوە بووە بە 85 هەزار دینار.

ئێستا هەر کیلۆیەک فاسۆلیای ئێرانی لە دوو هەزار و 600 دینارەوە بووە بە سێ هەزار و 400 دینار، واتە بۆ یەک کیلۆ 800 دینار گرانبووە.

فاسۆلیای بایەعی نرخەکەی هەرزان دەکات

بڕیارە لەگەڵ بەشەخۆراکی ئەم مانگە فاسۆلیاش دابەش بکرێت، بە وتەی بەڕێوەبەری چاودێری و بازرگانیی سلێمانی، ئەمە رەنگە ببێتە هۆی هەرزانبوونی فاسۆلیا.