سلێمانى
دوو کەس بە تۆمەتی دزینی 4 ملیۆن دینار و 5 هەزار دۆلار دەستگیرکران
وریا فەتاح
پۆلیسى سلێمانى دوو تۆمەتبارى دەستگیرکرد کە 4 ملیۆن دینار و 5 هەزار دۆلاریان لە هاوڵاتییەک دزیوە و پایسکلیان پێ کڕیوە.
بەڕێوەبەرایەتیی پۆلیسی پارێزگای سلێمانی لە راگەیەندراوێکدا بڵاویکردەوە، دوای ئەوەی هاووڵاتییەک لە نووسینگەی نەهێشتنی تاوانی راپەڕین سکاڵای تۆمارکرد کە بڕی 4,000,000 (چوار ملیۆن) دیناری عێراقی و 5,000 (پێنج هەزار) دۆلاری ئەمریکی لێ دزراوە، هێزەکانیان دەستیان بە لێکۆڵینەوە کردووە.
لە ڕاگەیەندراوەکەدا هاتووە: “دوای کۆکردنەوەی زانیاریی پێویست و وەرگرتنی بڕیاری دادوەر، مەفرەزەکانی نووسینگەی نەهێشتنی تاوانی راپەڕین توانییان هەردوو تۆمەتبارەکە بدۆزنەوە و دەستگیریان بکەن.”
پۆلیسی سلێمانی ئاماژەی بەوەش کردووە، لە کاتی دەستگیرکردنیاندا دەست بەسەر بەشێک لە پارە دزراوەکەدا گیراوە، بەڵام تۆمەتبارەکان بەشێکی تری پارەکەیان بۆ کڕینی ماتۆڕسکیل و کەلوپەلی دیکە خەرج کردبوو.
تۆمەتبارەکان بریتین لە (ع. ج. ح) لەدایکبووی ساڵی 1995 و (ز. ف. ع) لەدایکبووی ساڵی 1997. لە ئێستاشدا بە بڕیاری دادوەر و بەپێی ماددەی (444) لە یاسای سزادانی عێراقی راگیراون و لێکۆڵینەوە لەگەڵیاندا بەردەوامە.