گۆشتی سوور لە سلێمانی هەرزانتر بوو

دیلان محەمەدجەزا – سلێمانی

گۆشتی سوور لە سلێمانی زیاتر هەرزان بوو و کیلۆیەک گۆشتی بەرخی سپی و ناسک 16 هەزار دینار ناکەوێ.

هەژیر هیدایەت گۆشتفرۆشە و بە 964ـی وت، “ئەمڕۆ کیلۆیەک گۆشتی بەرخمان داوە بە 15 هەزار و 750 دینار کە روبعێک زەرەر دەکات، بەڵام ئەوەی هەیە کە لە جگەرەکەدا 20 هەزار دینارمان بۆ ماوەتەوە”.

وەک خۆی دەڵێت، گۆشتەکەیان لەگەڵ شوێنەکانی دیکە هیچ فەرق و جیاوازیی نییە و مۆر و هەموو شتێکیشی مەزبووتە، بەڵام ئەوان ئەو سیاسەتەیان گرتووەتەبەر کە دەڵێ، فرۆشی زۆر و قازانجی کەم.

بەقسەی ئەو گوشتفرۆشە پێشترکیلۆیەک گۆشتی بەرخ بە 20 هەزار دینار بوو، بەڵام لەبەر دۆخی خراپی خەڵک دایانبەزاندووە بۆ 15 هەزار و 750 دینار.

پێداچوونەوە: شۆڕش قادری