ریشسپى و پیاوماقوڵانى گوندێکى پشدەر راوکردن قەدەغە دەکەن

وریا فەتاح

کەسایەتی و ریشسپیسانی گوندی “لبانە” لە سنووری قەزای پشدەر، لە کۆبوونەوەیەکی تایبەتدا کۆمەڵێک بڕیار و ڕێنمایی نوێیان بۆ رێکخستنی کاروباری ناوخۆیی گوندەکە و پاراستنی ژینگەی ناوچەکە پەسەند کرد، هاوکات جەختیان لەوە کردەوە کە سەرپێچیکاران رووبەڕووی سزای یاسایی دەکرێنەوە.

بەپێی ڕاگەیەندراوی کۆبوونەوەکە کە لە پەیجى گوندەکەیان بڵاویان کردووەتەوە، بڕیارەکان بەم شێوەیەی خوارەوە جێبەجێ دەکرێن:

یەکەم: قەدەغەکردنی راوکردن بە هەموو شێوازەکانییەوە لە تەواوی سنووری گوندەکەدا.

دووەم:  تەلبەندکردنی شوێنە گشتییەکان بێ وەرگرتنی رەزامەندیی دەستەی ریشسپیسان قەدەغەیە.

سێیەم:  بڕینی داری تەڕ بە هەموو شێوەیەک قەدەغەیە.

چوارەم: رێگەنەدان بە هێنانی ئاژەڵی کەسانی دەرەوەی گوند بۆ ناو سنووری گوندی لبانە.

پێنجەم:  فرۆشتنی پوش و پاوەنی گوندەکە و تەرخانکردنی داهاتەکەی بۆ چاککردنی رێگاووبان و دابینکردنی پێداویستییە گشتییەکانی گوندەکە.

شەشەم:  قەدەغەکردنی هاوکاریکردن یان هێنانی کەسانی دەرەوەی گوند بۆ مەبەستی راوکردن و بەئامانجگرتنی راوگەکان، ( ئەم بڕیارە تەنیا بۆ پاراستنی ژینگەی ناوچەکەیە و کەسانی میوان ناگرێتەوە).

دەستەی ریشسپیسانی گوندی لبانە جەختیان لەوە کردووەتەوە کە پابەندبوون بەم بڕیارانەوە لە پێناو بەرژەوەندیی گشتی و پاراستنی سروشتی دەڤەرەکەیە، و هەر کەسێک پێشێلکاری بکات، بەپێی رێکارە یاساییەکان مامەڵەی لەگەڵدا دەکرێت.