راهێنانێکی پزیشکیی تایبەت لە نەخۆشخانەی شار بەڕێوەچوو – وێنە؛ تەندروستی سلێمانی
بۆ یەکەمجارە لە هەموو عێراقدا راهێنانێکی وا ئەنجام دەدرێت
راهێنانێکی پزیشکیی تایبەت لە نەخۆشخانەی شار بەڕێوەچوو
شۆڕش قادری
بۆ یەکەمجار لە هەموو عێراقدا راهێنانێکی تایبەت بە مامەڵەکردن لەگەڵ رووداوە لەناکاوەکان و بەهاناوەچوونی بریندارانی بەکۆمەڵ لە نەخۆشخانەی شاری سلێمانی بەڕێوەچوو.
بەڕێوەبەرایەتی گشتی تەندروستی سلێمانی چەند وێنەیەکی کاتی راهێنانەکەی بڵاوکردووەتەوە و نووسیویەتی، رێکخراوی پزیشکانی بێسنور بەمیوانداری بەرپرسانی رێکخراوی خاچی سووری نێودەوڵەتی، ڕاهێنانێکی مەیدانی و تاقیکارییان لە نەخۆشخانەی شاری سلێمانی بەڕێوەبرد.
راهێنانەکە تایبەت بووە بە مامەڵەکردن لەگەڵ رووداوە لەناکاوەکان و مامەڵە و بەهاناوەچوونی بریندارانی زۆر لە کاتی دۆخی نەخوازراو و قەیرانەکاندا.
لە راهێنانەکەدا تواناکانی نەخۆشخانەکە خراونەتە ژێر تاقیکردنەوەیەکی کردارییەوە بۆ ئەوەی روون ببێتەوە ستافی پزیشکی چۆن مامەڵە لەگەڵ هاتنی ژمارەیەکی زۆر لە برینداران دەکەن و رێکارەکانی دەستبەجێ پێشکەشکردنی چارەسەری بەپەلە چۆن بەڕێوە دەچن.
ئەم راهێنانە بۆ یەکەمجارە لەسەرانسەری عێراقدا بەڕێوەبچێت کە راهێنانی چارەسەری رووداوی لەناکاو و قوربانی بە کۆمەڵە.
د. شریهاری کاتامانشی، بەرپرسی بەشی فریاکەوتنی خێرای رێکخراوی خاچی سووری نێودەوڵەتی رایگەیاندووە، نەخۆشخانەی شار لەسەر ئاستی عێراق ناوەندێکی تەندروستیی زۆر پێشکەوتووە، بە شێوازێکی بێوێنە و سەردەمیانە مامەڵە لەگەڵ دۆخە سەختەکاندا دەکات و جێگەی شانازییە کە لە رۆژهەڵاتی ناوەڕاست نەخۆشخانەیەکی لەم شێوەیە هەیە.
