هەورامییەکان هەر ئەوەیان لێ دەوەشێتەوە
لەسەر گیرفانی خۆی 300 کەوی نازداری کڕی و ئازادی کردن
ئەمەل ناجی – هەورامان
هەورامییەکان لە ژینگەدۆستی و ژینگەپارێزیدا هاوتایان نییە و لەو بوارەدا هەمیشە پێشەنگ بوون، ئەوەتا گەنجێک لەسەر گیرفانی خۆی 300 کەوی نازداری کڕیوە و لە شاخە سەرکەشەکانی هەورامان ئازادی کردن.
ئالان حەمەکەریم ژینگەدۆستێکی خەڵکی شارەدێی تەوێڵەیە، ئەو بە 964ـی وت، “هەر کەوێک 9000 دینارم پێداوە و ئەو کارەشم تەنیا بۆ خزمەتی ژینگە و ئاوەدانکردنەوەی زیاتری شاخەکانی هەورامان کردووە”.
عابدین عەبدولڕەحمان بەڕێوەبەری پۆلیسی دارستان و ژینگەی هەڵەبجەش ستایشی ئەو کارەی کرد و وتی، “ئەمە یەکەمجارە ئەم ژمارە زۆرە کەوە بە یەکجار ئازاد دەکرێن، ئیشێکی تابڵێی جوانە و ئێمەش پشتیوانی لێ دەکەین”.
ئاماژەی بەوەشکرد، سروشتی کوردستان بە باڵندە و ئاژەڵە کێوییەکانەوە جوانە و هەرکەس راو بکات، بەدڵنیاییەوە رێکاری یاسایی بەرانبەر دەگیرێتەبەر.
پێداچوونەوە؛ شۆڕش قادری