گوندە فێنکەکەی زاخۆ تەنگی بە گەرمای هاوین هەڵچنیووە

شڤان عەبدوڵا – زاخۆ

گوندی کەشان، بەیەکێک لە گوندە هەرە فێنکەکانی هەرێمی کوردستان و ئیدارەی زاخۆ دادەندرێت، بەجۆرێک ئەمساڵ تاوەکو ئێسات پلەی گەرمییەکەی نەگەیشتووەتە 35 پلەی سیلیزی، هەربۆیەشە گەشتیاران بەلێشاو رووی تێدەکەن.

گوندەکە، دەکەوێتە باکووری رۆژهەڵاتی ئیدارەی زاخۆ و سەر بە قەزای باتیفایە.

محەمەد گوللی، دانیشتووی گوندەکەیە بە 964 ی وت، فێنکی گوندەکەیان بەراورد بە سەنتەری ئیدارەی زاخۆ، زیاتر لە 10 پلە فێنکترە، هەرچەندە پێشتر بەهۆی ئاڵۆزی و شەڕەوە هاتوچۆ تێیدا قەدەغە بوو، بەڵام ئێستا بەهۆی سەقامگیریی ئاسایشییەوە، بووەتە جێی سەرنجی ژمارەیەکی زۆری گەشتیاران.

محەمەد دەڵێت “گوندنشینان سەرقاڵی کشتوکاڵکردن و بەشێکیشیان بە بەخێوکردنی مەڕوماڵات و ئیشتاش بەشێکی دیکە بە بەڕێوەبردنی کەپری گەشتیارییەوە خەریکن”.

باس لەوەشدەکات، لە زستاناندا بەهۆی دابەزینی پلەکانی گەرما بۆ ژێر سفری سیلیزی و بەستنی ئاوی تانکییەکان، خەڵکەکەی روو لە سەنتەری زاخۆ دەکەن.

پێداچوونەوە؛ فەرهاد حەسەن