مزگەوتەکانی سلێمانی کێشەی قیبلەیان نییە
964+
پێشەوا محەمەد – سلێمانی
14 مزگەوتی سنووری پارێزگای سلێمانی کێشەی قیبلەیان هەبووە و چارەسەر کراون، وەزارەتی ئەوقاف دەڵێت، لە هیچ شوێنێکی تر ئەو کێشەیە نەبووە.
964 زانیویەتی، کێشەکە بۆ ساڵی 2014 دەگەڕێتەوە و هەر ئەوکاتەش قیبلەکان چاککراونەتەوە.
بەڕێوەبەرایەتیی ئەوقافی سلێمانی، هەینی رابردوو 19.3.2023، لە کۆنفرانسێکی رۆژنامەوانیدا رایگەیاند، 14 مزگەوتی ناوشاری سلێمانی بەهۆی ئەوەی بەهەڕەمەکی دروستکراون کێشە لە قیبلەکەیاندا هەبووە و راستکراونەتەوە.
بەپێی ئاماری وەزارەتی ئەوقافی هەرێم، 5820 مزگەوت لە هەرێمی کوردستاندا بوونیان هەیە.
نەبەز ئیسماعیل، وتەبێژی وەزارەتی ئەوقافی هەرێم بە تۆڕی 964ی راگەیاند، ئەوە لە ساڵی 2014 بووە کاتێک چەند خوێندکارێکی کۆلێژی شەریعە لێکۆڵینەوەیان کردووە و بۆیان دەرکەوتووە هەڵە لە قیبلەی 14 مزگەوتی سنووری سلێمانی هەیە.
بە قسەی ئەو، هەو ئەو ساڵە هەموو قیبلەکانیان چاککردووەتەوە و کێشە لە قیبلەی هیچ مزگەوتێکدا نەماوە.