شوتییەکەی ئەمساڵ چاکە و ئەوەی تەقی گەرمای بووە

دیلان محەمەدجەزا – سلێمانی

شوتی ناوخۆ گەیشت بە عەلوەی سلێمانی و سەرۆکی سەندیکای عەلوە و بەڕێوەبەری عەلوەی سلێمانی چوونەتە لای شوتی فرۆشەکانی ناو عەلوە و دەیانەوێ، ئەو تۆمارە ڤیدیۆیەی لە فەیسبووک بۆ تەقینی شوتییەکە بڵاوکرابوویەوە ساغ بکەنەوە.

چونکە خەڵک گومانی بۆ دروست بووە، وا ساڵانێکیشە شووتی دەرماناوی هەیە لە بازاڕدا و خەڵک زۆرجار بۆیان جیا ناکرێتەوە.

ئەمڕۆ یەکشەممە 14.6.2026، سەروەر عەلی سەرۆکی سەندیکای عەلوەی سلێمانی بە 964ی وت، ئێستا شووتی ناوخۆ پێگەیشتووە، لە دەڤەری راپەڕین و هەولێریشەوە شوتی دەهێنرێتە عەلوە، شوتی ئەمساڵ لە هەموو ساڵەکانی تر کوالێتی باشترە و بێ دەرمانە.

سامان ئیسماعیل بەڕێوەبەری عەلوەی سلێمانی لەبارەی تۆمارە ڤیدیۆکە دەڵێ، ئەوەی بڵاوکراوەتەوە، دیمەنی شوتییەکە کە ماوەیەکی زۆر ماوەتەوە و گەرمای زۆر لێی داوە، بەوەش بووە بەهۆکاری ئەوەی غازات پەیدا بکات و لەگەڵ قاژکردنی تەقیوە.

لەبارەی پشکنین بۆ شوتییەکان، ئەو ئاماژەی بەوە کرد کە سێ چۆر پشکنین بۆ هەر بارە شوتییەکە دەکرێ، تا رێگەی پێ بدرێ داخڵی عەلوە بکرێ و دواتر ساغبکرێتەوە، وەک روونی کردەوە ئەو رێکارە لە عەلوەی سلێمانی جێبەجێ دەکرێ.

پێداچوونەوە: ئەحمەد مستەفا