بۆ یەکەمجار لە ناوەندی هەڵەبجە زەوی دابەش دەکرێت

هەژان هادی

ئەو فەرمانبەرانەی لە هەڵەبجە لە 2005ـەوە فەرمانی وەرگرتنی زەویان هەیە و تا ئێستا سوودمەند نەبوون، هەفتەی داهاتوو زەوی وەردەگرن.

سەرۆکایەتی شارەوانی هەڵەبجە لە راگەیەندراوێکدا دەڵێت، ئەو فەرمانبەرانەی لە 2005ـەوە فەرمانی وەرگرتنی زەویان هەیە و تا ئێستا سوودمەند نەبوون، ژمارەیان نزیکەی 500 کەسە و بە تیروپشک زەوی وەردەگرن.

یەکەمجارە لە ناوەندی پارێزگای ھەڵەبجە زەوی بەسەر فەرمانبەراندا دابەشدەکرێت، پێشتر تەنیا لە سنووری ناحیەی بیارە دابەشکراوە.

شارەوانی هەڵەبجە ئەو فەرمانبەرانە ئاگادار دەکاتەوە کە رۆژی دووشەممە 08.06.2026 کاتژمێر 9:30ـی بەیانی، لە هۆڵی مستەفا زەڵمی ئامادەبن بۆ تیروپشکی وەرگرتنی زەوی.