داواکاری قوتابیانی هەڵەبجە
“مەنهەج تەواو نەکراوە و تاقیکردنەوەکانی کۆتایی ساڵ دوابخەن”
964+
ئەمەل ناجی – هەڵەبجە
داواکارییەکانی قوتابیانی پۆلی 12 هێشتا بێ جواب ماوەتەوە و هیچیان بۆ نەکراوە، بۆیە ئەمڕۆ دیسان لە هەڵەبجە و چەند شارێکی دیکە گردبوونەوە.
قوباییەکان پێشتر و چەند جارێکی دیکە لە ناوچە جیاجیاکانی کوردستان گردبوونەتەوە و ناڕەزاییان دەربڕیوە، ئەوان داوای دواخستنی تاقیکردنەوە و گەڕاندنەوەی ئارەزوومەندانەی وانەکانی کوردی و عەرەبی دەکەن، واتە تاقیکردنەوەی ئەو دوو دەرسە بۆ کۆتایی ساڵ ئارەزوومەندانە بێ بۆ بەشی زانستی.
ماردین ئیقبال یەکێک لەو قوتابیانە قسەی بۆ مایکی 964 کردووە و دەڵێت، “ئەمساڵ 50 رۆژمان فەوتاوە، چونکە لەناو شەڕدا بووین و کارەبا و غازمان نەبووە و سترێس و دڵەڕاوکێی زۆرمان هەبووە، لە زۆربەی خوێندنگاکان مەنهەج تەواو نەکراوە، لەبەرئەوەی لەکاتی شەڕدا خوێندن کرا بە ئۆنلاین و نەمانتوانی وەک پێویست دەرسەکانمان تەواو بکەین”.
هاوکات شەنیا ماکوان داوا لە خەڵک دەکات کۆمێنتی ناشیرینیان بۆ نەنووسن و دەشڵێت، “داواکارین کە کاتی تاقیکردنەوەکان دوابخرێت بۆ رۆژی 1.7.2026، بۆ ئەوەی بتوانین بە تەواوی پێداچوونەوە بە وانەکاندا بکەین”.
پێداچوونەوە؛ شۆڕش قادری
قوتابیانی پۆلی 12 بەشێکی شەقامی سالمیان گرت و قەڵەباڵغی دروستبوو
