ئەمریکا و ئێران دووبارە دانوستان دەکەن

964+

ئەرسەلان عەبدوڵا

هەوڵەکان چڕکراونەتەوە بۆ گەڕی دووەمی دانوستانەکانی نێوان ئەمریکا و ئێران  و پێدەچێت لە رۆژانی داهاتوو دووبارە دابنیشن.

لەمبارەیەوە دیپلۆماتکارێکی ئێرانی، کە ناوی نەهاتووە، بە ئاژانسی رۆیتەرزی راگەیاندووە: “گەڕی دووەمی دانوستانەکانمان لەگەڵ ئەمریکا کۆتایی ئەم هەفتەیە یان سەرەتای هەفتەی داهاتوو دەکرێت”.

هاوکات ئاژانسی ئەسۆشێتد پرێس بە پشتبەستن بە بەرپرسان و دیپلۆماتکارانی ئەمریکا و پاکستانی و دیپلۆماتکارانی وڵاتێکی نێوەندگیر، ئەمڕۆ سێشەممە رایگەیاند، ئەمریکا و ئێران بیر لە ئەنجامدانی خولێکی نوێی دانوستانەکان دەکەنەوە، سەرچاوە دیپلۆماسییەکان پشتڕاستی دەکەنەوە کە هەردوولا پێشتر رێککەوتوون لەسەر ئەنجامدانی ئەم خولە و ئەگەری هەیە پێنجشەممە گەڕێکی دیکەی دانوستان ئەنجام بدرێت.

هەر لەم چوارچێوەیەدا ئاژانسی بلۆمبێرگ بڵاویکردەوە، هەردوو لایەنی ئەمریکی و ئێرانی لە هەوڵی ئەوەدان ئاگربەست درێژ بکەنەوە، پێش ئەوەی هەفتەی داهاتوو کۆتایی بێت.

میدیای دیکەی جیهانی باسی ئەوە دەکەن، هەردوو لا سەرەڕای گرژییەکان و هەروەها گەمارۆی دەریایی ئێران لە لایەن ئەمریکاوە، بەڵام هێشتا پەیوەندییان هەیە و لە بارەی ئاگربەست و ئەنجامدانی دانوستان گفتوگۆ دەکەن.