هەڕەشەکانی ترەمپ لە بەرپرسانی ئێران بەهای نەوتی بەرزکردەوە

شۆڕش قادری

هەڕەشەکانی ترەمپ لە بەرپرسانی ئێران بەهای نەوتی بەرزکردەوە، ئەمڕۆ نرخی هەر بەرمیلێک لە 107 دۆلار نزیک بووەوە.

ئەمڕۆ پێنجشەممە 2.4.2026 و لە کاتی کردنەوەی بازاڕی جیهانیی نەوت، هەر بەرمیلێک نەوتی خاوی برێنت بە 106 دۆلار و 9 سەنت دیاری کراوە و نرخەکەی بەراورد بە دوێنێ ئێوارە 5.73 بەرزبووەتەوە.

هاوکات نرخی یەک بەرمیل نەوتی سووکی تێکساس بە 104 دۆلار و 6 سەنت مامەڵەی پێوە دەکرێت و ئەویش نرخەکەی 4.46٪ بەرزبووەتەوە.

ئەوەش دوای ئەوە دێت کە کاتژمێر 4ـی بەرەبەیانی ئەمڕۆ بەکاتی هەولێر دۆناڵد ترەمپ سەرۆکی ئەمریکا وتارێکی 19 خولەکی لە کۆشکی سپی پێشکەش کرد و وتی، لەگەڵ بەرپرسانی ئێران لە گفتوگۆدان، ئەگەر رێک نەکەون، خراپیان بەسەردێت و لە دوو بۆ سێ هەفتەی داهاتوودا وڵاتەکەیان دەگەڕێننەوە چاخی بەردین.