پێنجوێن؛ وەرگرتنەوەی کارتی نیشتیمانی تەنیا لە بەیانیاندا دەبێت

ژێوار خدر

لە رۆژی یەکشەممەی داهاتووەوە، وەرگرتنەوەی کارتی نیشتیمانی لە قەزای پێنجوێن تەنیا لە کاتی دەوامی بەیانیاندا دەبێت و چیتر لە دوای نیوەڕوان کارت نادرێتەوە، فەرمانگەی کارتی نیشتیمانیی شارەکەش دەڵێت “بۆ وەرگرتنەوەی کارتەکانتان دوای نیوەروان سەردان مەکەن”.

فەرمانگەی کارتی نیشتیمانی پێنجوێن ئاگادارییەکی بڵاوکردەوە و تێیدا هاتووە، گۆڕانکاری لە کاتی پێدانەوەی کارتەکان بە هاوڵاتییان کردووە، بەپێی بڕیارە نوێیەکە، لە رۆژی یەکشەممەوە پڕۆسەی پێدانەوەی کارتی نیشتیمانی تەنیا دەخرێتە ناو دەوامی بەیانیان و لەو کاتەوە بۆ لەمەودوا لە کاتی ئێواراندا ئەو کارە ئەنجام نادرێت.

ئەم بڕیارە بۆ رێکخستنەوەی کارەکانی ناو فەرمانگەکەیە و داوا لە هاوڵاتییانی سنووری پێنجوێن دەکرێت بۆ وەرگرتنەوەی کارتەکانیان تەنیا لە کاتژمێرەکانی بەیانیاندا سەردانیان بکەن، فەرمانگەکە جەخت دەکاتەوە کە پابەندبن بەو کاتانەی دیاریکراون بۆ ئەوەی هیچ ئاستەنگ و ماندووبوونێک بۆ هاوڵاتییان دروست نەبێت.