عێراق داخستنی ئاسمانی وڵاتەکەی بۆ 72 کاتژمێری دیکە درێژکردەوە

وریا فەتاح

دەسەڵاتی فڕۆکەوانیی مەدەنیی عێراق، ئەمڕۆ یەکشەممە، بڕیاریدا بە درێژکردنەوەی داخستنی ئاسمانی وڵات بەڕووی سەرجەم گەشتە هاتوو، چوو و تێپەڕبووەکاندا بۆ ماوەی 72 کاتژمێری دیکە.

دەسەڵاتى فڕۆکەوانیى مەدەنى عێراق لە بەیاننامەیەکدا دەڵیت، “بڕیاردرا بە درێژکردنەوەی داخستنی ئاسمانی عێراق بەڕووی سەرجەم فڕۆکەکاندا بۆ ماوەی (72) کاتژمێر، کە لە کاتژمێر 12:00ی نیوەڕۆی ئەمڕۆ یەکشەممە 22ی ئازاری 2026ـەوە دەستپێدەکات تاوەکو کاتژمێر 12:00ی نیوەڕۆی رۆژی چوارشەممە، وەک رێکارێکی خۆپارێزی کاتی.”

لە بەشێکی دیکەی بەیاننامەکەدا ئاماژە بەوە کراوە کە ئەم بڕیارە لەسەر بنەمای هەڵسەنگاندنی بەردەوامی دۆخی ئەمنی و پەرەسەندنە ناوچەییەکان دراوە، و بەگوێرەی پێشهاتە نوێیەکانیش جارێکی دیکە هەڵسەنگاندن بۆ بڕیارەکە دەکرێتەوە.

لە 28ـى شوبات و لەگەڵ دەستپێکردنى جەنگ، ئاسمانى عێراق بەڕووى گەشتە ئاسمانییە مەدەنییەکاندا داخرا و تائێستا بەردەوامى هەیە و هەر سێ رۆژ جارێکیش، داخستنەکە درێژ دەکرێتەوە.