جارێکى تر درێژکرایەوە

وریا فەتاح

دەسەڵاتی فڕۆکەوانیی شارستانیی عێراق بڕیاریدا داخستنی ئاسمانی وڵاتەکەی بەڕووی سەرجەم گەشتە ئاسمانییەکاندا بۆ ماوەی 72 کاتژمێری دیکە درێژ بکاتەوە و دەڵێت، بڕیارەکە “رێکارێکی خۆپارێزیی کاتییە”.

لە راگەیاندراوێکدا کە ئەمڕۆ دووشەممە 16.3.2026 بڵاویکردووەتەوە، دەسەڵاتی فڕۆکەوانیی عێراق ئاماژەی بەوە کردووە، بڕیاریان داوە داخستنی ئاسمانی عێراق بەڕووی سەرجەم فڕۆکە (هاتوو، رۆیشتوو و تێپەڕبووەکان)ـدا درێژ بکەنەوە.

بەپێی راگەیاندراوەکە، بڕیاری درێژکردنەوەکە لە کاتژمێر 12:00ـی نیوەڕۆی ئەمڕۆ دووشەممەوە چۆتە بواری جێبەجێکردنەوە و تاوەکو کاتژمێر 12:00ـی نیوەڕۆی رۆژی پێنجشەممەی داهاتوو بەردەوام دەبێت.

دەسەڵاتی فڕۆکەوانیی عێراق هۆکاری بڕیارەکەی روونکردووەتەوە و دەڵێت، “ئەم هەنگاوە بە پشتبەستنە بە هەڵسەنگاندنی بەردەوامی بارودۆخی ئەمنی و پێشهاتەکانی ناوچەکە، بەپێی گۆڕانکارییە نوێیەکانیش هەڵسەنگاندنی بۆ دەکرێتەوە”.

لە 28ـى شوباتەوە، لەوکاتەى جەنگى ئەمریکا و ئیسرائیل دژى ئێران دەستیپێکردووە، ئاسمانى عێراق بە داخراوى ماوەتەوە.