رێگە نادەین خاکی عێراق بۆ لێدانی دراوسێیەکانی بەکار بهێنرێت

ئەرسەلان عەبدوڵا

وەزیری دەرەوەی عێراق فوئاد حوسێن لە کۆبوونەوەی نائاسایی وەزیرانی دەرەوەی وڵاتانی عەرەبی رایگەیاند، عێراق نابێتە بەشێک لە ململانێی جەنگ و رێگەش نادات خاکەکەی بۆ لێدانی دراوسێیەکانی بەکاربهێنرێت.

کۆبوونەوەکە ئەمڕۆ یەکشەممە 8.3.2026 بە شێوەی ئۆنلاین کرا و تێیدا وەزیری دەرەوەی عێراق رایگەیاند، عێراق هەوڵدەدات پەیوەندییەکانی بۆ هەوڵە دیپلۆماسییەکانی بەکاربهێنێت بۆ راگرتنی شەڕ و گەڕانەوە بۆ ئاشتی.

وتیشی، عێراق نابێتە بەشێک لە ململانێی جەنگ و رێگەش نادات خاکەکەی بۆ لێدانی دراوسێیەکانی بەکاربهێنرێت.

بەپێی راگەیاندراوی وەزارەتی دەرەوەی عێراق، وەزیری دەرەوە باسی ئەوەشی کرد، عێراق یەکێک لە لایەنگرانی سەرەکی دانوستانەکانی نێوان کۆماری ئیسلامی ئێران و ویلایەتە یەکگرتووەکانی ئەمەریکا و هەرواش دەمێنێتەوە.

ئاماژەی بەوەش دا، عێراق ئیدانەی هەڵمەتە سەربازییە بەردەوامەکانی دژ بە ئێران دەکات و لە هەمان کاتیشدا دووپاتی دەکاتەوە کە فراوانکردنی بازنەی شەڕەکە مەترسی لەسەر هەموو وڵاتانی ناوچەکە دروست دەکات، هەروەها دەبێتە هۆکارێک بۆ درێژەدان و درێژەدان بە ململانێیەکان.

وەزیری دەرەوەی عێراق هاوسۆزی حکومەتی عێراقی لەگەڵ گەلانی عەرەبی دووپاتکردەوە، ئەو هێرشانەشی رەتکردەوە، کە ئێران بەشێک لە وڵاتانی عەرەبی کردووەتە ئامانج و داوای رێزگرتن لە سەروەری نیشتمانی و پابەندبوون بە یاسا نێودەوڵەتییەکان دەکات بۆ رێگریکردن لە هەر جۆرە پەرەسەندنێک لە ناوچەکەدا.