"عەقدمان بۆ نەکەن هەڵیناکەین"
خاوەن موەلیدەکانی سلێمانی لە بڕیارەکەی قایمقامیەت ناڕازین
964+
دیلان محەمەدجەزا – سلێمانی
خاوەن موەلیدەکانی سلێمانی لە بڕیارەکەی قایمقامیەت ناڕازین و دەڵێن، تا عەقدیان بۆ نەکەن، موەلیدەکانیان هەڵناکەن.
لە سلێمانی موەلیدەکان هەڵدەکرێنەوە
چەند کاتژمێرێک بەسەر بڕیارەکەی قایمقامیەتی سلێمانی بۆ هەڵکردنەوەی موەلیدە ئەهلییەکان لەم بێ کارەباییەدا تێنەپەڕی، خاوەن موەلیدەکان لەبەردەم سەندیکای کۆمەڵەی موەلیدە ئەهلییەکان گردبوونەوە و ناڕەزایەتیان دەربڕی.
نەبەز مەجید نوێنەری خاوەن موەلیدەکان بە 964ـی وت، “هەر موەلیدەیەک ملیۆنێک بۆ ملیۆن و نیوێک خەرجی هەیە، پێشوەختە پێتناڵێ لەپڕدا پێتدەڵێ بڕۆ ئیش بکە، خۆ ئاوا نابێ، دەبێ عەقدی ساڵێک دوو ساڵی بۆ بکەی و بەرنامەی بۆ دابنێی”.
ئاماژەی بەوەشکرد، نەدەبوو حکومەت گرێبەستی پێشوویان هەڵبوەشێنێتەوە و لەکاتێکی وەک ئەمڕۆدا ئیشیان پێ بکردایەوە.
ئەمڕۆ سێشەممە 3.3.2026 قایمقامیەتی سلێمانی بڕیاریدا موەلیدەکان لە کاتژمێر 4ـی عەسر بۆ 1ـی شەو و پارشێوانیش لە کاتژمێری 4ـی بەرەبەیان تاوەکو کاتژمێر 5 هەڵبکرێنەوە، ئەگەر کارەبای نیشتمانی نەبوو.
پێداچوونەوە؛ شۆڕش قادری
