ئەمجارە لە زانکۆکانەوە دەستیپێکرد
خۆپیشاندان لەناو جەرگەی تارانەوە سەریهەڵدایەوە
964+
شۆڕش قادری
خۆپیشاندان و ناڕەزایی لەناو جەرگەی تارانی پایتەختی ئێرانەوە سەریهەڵدایەوە و ئەمجارە لە زانکۆکانەوە دەستیپێکرد.
تۆڕی هەواڵی بی بی سی بڵاویکردووەتەوە، ئەمڕۆ شەممە 21.2.2026 لە زانکۆکانی بەهەشتی و ئەمیرکەبیر و پیشەسازی شەریف خوێندکاران دژی کوژران و دەستگیرکردنی هاوڕێکانیان لە خۆپیشاندانەکانی سەرەتای ئەمساڵ گردبوونەتەوە و ناڕەزایەتییان دەربڕیوە.
لە زانکۆی پیشەسازی شەریف، خوێندکارانی ئەندام لە سوپای پاسداران کە بە “بەسیجی دانشجویی” ناسراون، هێرشیان کردووەتە سەر خوێندکارە ناڕازییەکان و گرژی و ئاڵۆزی دروستبووە.
رۆژی 28.12.2025 خۆپیشاندان و ناڕەزایەتی لەناو بازاڕی گەورەی تارانەوە دژی گرانی و دابەزینی بەهای تمەن سەریهەڵداوە و دواتر زۆربەی شارەکانی ئێران و رۆژهەڵاتی کوردستانی گرتەوە، لە چەند شوێنێک گرژی و توندوتیژی لەنێوان هێزەکانی حکومەت و خۆپیشاندەران دروستبوو، بەهۆیەوە هەزاران کەس کوژران و ژمارەیەکی دیکەش برینداربوون.
لە دوایین لێدوانیدا شەوی رابردوو دۆناڵد ترەمپ سەرۆکی ئەمریکا رایگەیاند، لە خۆپیشاندانەکاندا نزیکەی 32 هەزار کەس کوژراون.
