شارەزایەکی بازاڕەکە بۆ 964:
“زێڕ و زیو بەرزدەبنەوە و هەڕاجیان مەکەن”
964+
دیلان محەمەدجەزا – سلێمانی
دابەزینی بەهای زێڕ و زیو لە چەند رۆژی رابردوودا بازاڕەکانی کوردستانی شڵەقاندووە و خەڵکێکی زۆر تووشی زەرەر و زیان بوون، شارەزایەکی بازاڕەکە دەڵێت، بەپێی پێشبینییەکان جارێکی دیکە بەزردەبنەوە، بۆیە هەڕاجیان مەکەن و خۆتان تووشی زەرەر مەکەن.
نەورۆز هادی شارەزای بواری بازاڕە داراییەکان قسەی بۆ مایکی 964 کردووە و دەڵێت، “چەند هۆکارێک کاریگەرییان لەسەر دابەزینی بەهای زێڕ و زیو لە چەند رۆژی رابردوودا هەبوو، یەکێک لەوانە کشانەوەی مامەڵەکارێکی زۆر لە بازاڕی جیهانیدا بوو”.
“بازاڕی زێڕ و زیو لە کوردستان لەژێر کۆنتڕۆڵدا نییە و بەشێوەیەکی خەیاڵی نرخی دەخەنە سەری”، نەورۆز هادی وای وت.
ئاماژەی بەوەشکرد، لە ساڵی 1980ـەوە دابەزینی بەو شێوەیە تۆمار نەکراوە و تەنیا لە رۆژی هەینی رابردوو سێ ترلیۆن دۆلار لە بازاڕی ئابووری جیهانیدا زەرەر کراوە.
نەورۆز هادی داوا لەو کەسانەدا دەکات کە زێڕ و زیویان لە نرخی بەرزدا کڕیوە، پەلە نەکەن لە فرۆشتنەوەیان چونکە، بەپێی پێشبینییەکان جارێکی دیکە بەرزدەبنەوە.
پێداچوونەوە؛ شۆڕش قادری
