وێنەی تۆمەتبارەکان و ئەو کەلوپەلانەی بۆ ساختەکردنی رەگەزنامە بەکاریانهێناوە. فۆتۆ/پۆلیسی سلێمانی
دوو کەس بە ژمارەیەک مۆری ساختەوە گیران
ویستوویانە بە رەگەزنامەی ساختە لە فەرمانگەکاندا مامەڵەکانیان بڕوێنن
964+
هاوبەش ئەبوبەکر
لە سلێمانی دوو کەس دەستگیرکران کە کاری ساختەکردنی بەڵگەنامە، مۆر و دەفتەری رەگەزنامەیان کردووە و ویستویانە لە فەرمانگەکاندا مامەڵەی پێوە بکەن.
بەڕێوەبەرایەتی پۆلیسی سلێمانی، ئەمڕۆ سێشەممە 7.3.2023 لە پەیجی خۆیان لە فەیسبووک بڵاویانکردەوە، دوو تۆمەتباریان بەژمارەیەک مۆر و کۆمەڵێک دەفتەری ئامادەکراوی رەگەزنامەی ساختەوە دەستگیرکردووە.
“دەستگیرا بەسەر ژمارەیەک مۆر و رەگەزنامەی ساختەدا، کە تۆمەتبارەکان بەنیازبوون بەڵگەنامەی پێ ساختە بکەن و لە فەرمانگەکاندا مامەڵەی پێوە بکەن،” پۆلیسی سلێمانی وا دەڵێت.
لەئێستادا هەردوو تۆمەتبار بەبڕیاری دادوەر و بەپێی ماددەکانی 289/298 لەیاسای سزادان راگیراون و لێکۆینەوە لەگەڵیاندا بەردەوامە.