عومڕەکارێکی کورد لە شاری مه‌ككه‌ کۆچی دوایی کرد

وریا فەتاح

بەرەبەیانى ئەمڕۆ پێنجشەممە، عومرەکارێکى تەمەن 64 ساڵ، لە شارى مەککە کۆچى دواى کرد.

کاروان ستوونى، وتەبێژى بەڕێوەبەرایەتى حەج و عومرەى کوردستان بە 964ـى وت،”عومرەکارەکە ناوى “مەجید ئەحمەد”ـە و تەمەنى 64 ساڵە و ئەم بەرەبەیانییە لە شارى مەککە، کۆچى دوایى کردووە”.

وەک باسى دەکات، عومرەکارەکە خەڵکى شارى دهۆکە و بڕیاریشە هەر لە شارى مەککە بەخاک بسپێردرێت.

بەوتەى کاروان ستوونى، کەسوکارەکەى لەگەڵ کۆچکردوو هاوسەفەر بوون و پێشتریش لە کوردستان نەشتەرگەرى چاندنى گورچیلەى بۆ کراوە، بەڵام دواى گەیشتنى لە سعودیە لە شارى مەککە جەڵتەى دڵ لێى داوە و دواى مانەوەى بۆ 7 کاتژمێر لە نەخۆشخانە، گیانى لەدەستداوە.

بەپێى ئامارەکانى بەڕێوەبەرایەتى حەج و عومرە، لەسەرەتاى ئەمساڵەوەـ 12 عومرەکارى هەرێمى کوردستان، لە وڵاتى سعودیە گیانیان لەدەستداوە.