كرێكارێكی هەولێر خەڵاتی دەستپاكیی فرسەت سۆفی پێشكەش كرا
چی كردووە؟
خەڵاتی دەستپاكی “فرسەت سۆفی” بە كرێكارێک درا
964+
ئەرسەلان عەبدوڵا
ئەمڕۆ هاوكات لەگەڵ یادی پێنج ساڵەی كۆچی دوایی پارێزگای پێشووی هەولێر د. فرسەت سۆفی، لە رێوڕەسمێكدا خەڵاتی “دەستپاكی” بە كرێكارێكی هەولێر درا، كە كارێكی مرۆڤانە و پڕ لە ئەمەك و دەستپاكی ئەنجام دا.
رێوڕەسمی یادی پێنج ساڵەی كۆچی دوایی د. فرسەت سۆفی لە گۆڕستانی شێخ ئەحمەد و لەسەر گۆڕی خوالێخۆشبوو ئەنجامدرا، كە پارێزگاری هەولێر و بنەماڵەی فرسەت سۆفی و ژمارەیەكی دیكەی بەرپرس و هاوڵاتیان ئامادەبوون.
هەر لە بۆنەكەدا، خەڵاتی “دەستپاكیی د. فرسەت سۆفی” پێشكەش بە كرێكارێكی خەڵكی هەولێر بە ناوی نەجات نادر سادق كرا، كە لە رۆژانی رابردوو جانتایەكی پڕ پارە و كارتی بانكی و كەلوپەلی دیكەی دۆزیوەتەوە و رادەستی خاوەنەكەی كردووەتەوە، كە گەشتیارێكی عەرەب بووە.
پارێزگاری هەولێر ئومێد خۆشناو لە بارەی خەڵاتەكە بە 964ی راگەیاند، كرێكارەكە هەژارە و كەسێكیشی لە ماڵەوە نەخۆشی درێژخایەنی هەیە و كرێچییشە، ژیانی سەختە، بەڵام ئامادەبوو ئەو جانتایە بە ئەمانەتەوە بداتەوە خاوەنەكەی، كە زیاتر لە 15 هەزار دۆلار و چەندین شتی دیكەی بەبەهای تێدابوو، بۆیە بە شایستەی خەڵاتەكەمان زانی”.
وتیشی، خەڵاتی دەستپاكیی د. فرسەت سۆفی پێشكەش بەو كرێكارە كرا، كە بریتییەكە لە بڕوانامەی رێزلێنان و پەیكەرێك، لەگەڵ بڕی سێ هەزار دۆلار.
ئەمە پێنجەم ساڵە خەڵاتی دەستپاكی د. فرسەت، کە وەک سیمبولی دەستپاکى و دادپەروەریی دەناسێندرێت، لە لایەن پارێزگای هەولێرەوە پێشكەش دەكرێت و وەك وەفا و یادێكە بۆ پارێزگاری پێشووی كۆچكردوو.
