دیمەنێك لە دەنگدانی تایبەتی 2025 لە هەولێر، فۆتۆ: 964
تۆڕی چاودێریی هەڵبژاردن
تا نیوەڕۆ 1841 پێشێلكاری لە دەنگدانی تایبەت تۆماركرا
964+
ئەرسەلان عەبدوڵا
هاوپەیمانی تۆڕەکانی چاودێری هەڵبژاردنەکان ئەمڕۆ راپۆرتی خۆی سەبارەت بە بەڕێوەچوونی هەڵبژاردنەکان بڵاوکردەوە و ئاماژەی بەوەدا کە تا نیوەڕۆ هەزار و 841 سەرپێچی لە سەرانسەری پارێزگاکانی عێراق تۆمارکراوە.
لە راپۆرتەکەدا ئاماژە بەوە کراوە کە پێشێلکارییەکان پەیوەندییان بە پێشێلکردنی نهێنی دەنگدانەوە هەیە، وەک دەنگدانی گرووپ یان هێنانی مۆبایل بۆ ناو بنکەکانی دەنگدان.
هەروەها ئاماژەی بە بەردەوامبوونی چالاکییەکانی بانگەشەی هەڵبژاردنەکان کردووە لە رۆژی دیاریکراوی بێدەنگی هەڵبژاردنەکاندا، لەگەڵ هەندێک نموونەی کڕینی دەنگەکان لە دەرەوەی ناوەندەکانی دەنگدان.
راپۆرتەکە زیاتر ئاماژەی بەوە کردووە رێژەی بەشداریکردنی دەنگدەران تا نیوەڕۆ زۆر بووە.
رێکخەری گشتیی تۆڕی شەمس هۆگر چەتۆ لەمبارەیەوە، بە 964ی راگەیاند، تا نیوەڕۆ کۆی ژمارەی حاڵەتەکان، کە ئێمە پێی ناڵێین “پێشێلكاری” بەڵکو پێی دەڵێین “سەرپێچی” بەهۆی پابەندنەبوون بە رێکارەکانەوە، گەیشتە هەزار و 841 حاڵەت، کە لە سەرانسەری پارێزگاکانی عێراقدا تۆمارکراوە.
ئەم پێشێلکارییانە لەسەر پرسە سەرەکییەکان بوو، دیارترینیان پێشێلکردنی نهێنی دەنگدان بوو، کە دەگەڕێتەوە بۆ دەنگدانی گروپ یان چوونە ژوورەوەی مۆبایل بۆ ناو بنکەکانی دەنگدان، هۆگر چەتۆ وای وت.
دەشڵێت، بەشێکی دیکەی پێشێلکارییەکان پەیوەندی بە بوون و بەردەوامبوونی چالاکییەکانی بانگەشەی هەڵبژاردنەوە هەیە تەنانەت لە رۆژی دیاریکراوی بێدەنگی هەڵبژاردنەکاندا، لەگەڵ چەندین نموونەی ئەمەدا کە بەدی دەکرێت.
حاڵەتەکانی کڕینی دەنگەکان تۆمارکراون، تیمە مەیدانییەکان چاودێری ئۆتۆمبێلەکانیان کردووە و کەسانیش لە دەرەوەی بنکەکانی دەنگدان وەستاون. چاودێران وێنەی ئەم کەسانەیان گرتووە و دواتر گرتە ڤیدیۆییەکان لە سۆشیال میدیا بڵاوکرانەوە، ئەمەش هەر قسەی هۆگر چەتۆی رێکخەری گشتیی تۆڕی شەمسە.
باسی ئەوەش دەكات، پێشێلکارییەکانی دیکە بریتی بوون لە جێبەجێکردنی ناتەواوی رێکارەکان، وەک رووننەکردنەوەی پرۆسەکە بۆ هەموو ئامادەبووان، دواکەوتنی کردنەوەی هەندێک بنکەی دەنگدان بەهۆی درەنگهاتنی کارمەندان یان تێکچوونی کەمی ئامێرەکان، هەروەها لە چەند بنکەیەکی دەنگدان حاڵەتی دوورخستنەوەی بەشێک لە نوێنەران و چاودێرانی قەوارە سیاسییەکان تۆمارکراون.
ئەمڕۆ 9.11.2025 دەنگدانی تایبەت لە پرۆسەی هەڵبژاردنی خولی شەشەمی پەرلەمانی عێراق بەڕێوەدەچێت و تا شەشی ئێوارە بەردەوام دەبێت.
