چەندین خێزان لە ناو لێشاوی سەردانیکەرانی فێستیڤاڵی هەنار گیریان خواردووە

964+

ئەرسەلان عەبدوڵا

بەهۆی قەرەباڵغی و زۆریی سەردانیكەرانی فێستیڤاڵی هەناری هەڵەبجە، هاوڵاتیان گیریان خواردووە و رێگە بەرناكەوێت، بەڵام هەڵەبجەییەكان دەرگای ماڵەكانیان واڵاكردووە بۆ ئەو میوانانەی دەیانەوێت لە شارەكەدا بمێننەوە.

ئەمشەو بە هەزاران كەس لە رێگەی گەڕانەوە لە فێستیڤاڵی هەناری هەڵەبجە تووشی زەحمەتیی هاتوون و تا ئێستاش هەر قەرەباڵغە، رێ بە رێ ناكەوێت و كێشە بۆ هاتوچۆ دروست بووە، ئەمە هاوڵاتیانی شارەكانی دیكەی تووشی بێتاقەتی كرد و هەندێكیان لە سۆشیال میدیا وێنە و ڤیدیۆیان پۆست كردووە كە چۆن لە ئۆتۆمبێلەكانیان ماون و ناتوانن بڕۆن.

هاوكات چەند كەسایەتییەكیش رەخنە و گلەییان بە سەرپەرشتیارانی فێستیڤاڵ و بەرپرسانی شارەكە كردووە، كە دەبوو چارەیەك بۆ ئەم بارودۆخە بكەن و پلانی گونجاویان بۆ هاتوچۆ و رێكوپێكی فێستیڤاڵەكە هەبێ.

لە بەرامبەر ئەوەدا هاوڵاتیانی شاری هەڵەبجە هەر لە سۆشیال میدیا و لە رێگەی نووسینی كۆمێنت بۆ ئەو كەسانەی پۆستیان كردووە و گیریان خواردووە، داوایان لێكردوون نەڕۆنەوە و ئەمشەو دەرگای ماڵەكانیان بۆ دەكەنەوە و میوانیان بن.

تەنانەت هەندێكیان ژمارەی تەلەفۆنی خۆیان داناوە و داوا دەكەن هەر میوانێكی شارەكە دەیەوێت بمێنێتەوە، لە خزمەتیان دەبن و بچووكییان دەكەن.

هەڵەبجەییەكان بەم كارەیان زیاتر وەك هەنارەكەیان خۆیان شیرین و مێخۆش كرد و سەرنجی میوانانیان بۆ خۆیان راكێشا.

دوو رۆژە فێستیڤاڵی هەناری هەڵەبجە بەڕێوەدەچێ و سبەی كۆتایی دێت، بەڵام ئەمساڵ هاتوچۆ و چوون و هاتنەوە لە شارەكە، ئاستەنگی گەورەی بەردەم میوانان و گەشتیاران بوو، كە وا پێویست دەكات لە ساڵی داهاتوو پێشوەختە چارەسەری ئەم گرفتە بكرێت.