بازاڕی چاپخانەکان گەرم و دروستکردنی پۆستەر هەرزان بووە

رێباز خدر – هەولێر

دوای دەستپێکردنی بانگەشەی هەڵبژاردنی پەرلەمانی عێراق، بازاڕ چاپخانەکان گەرم بووە و کاندید هەیە بۆ دروستکردنی پۆستەرەکانی نیو ملیۆن دۆلاری خەرج کردووە.

رابەر قاسم کارمەندی چاپەمەنی ئافاق لە هەولێری پایتەخت بە 964ـی وت، “لەگەڵ دەستپێکردنی بانگەشەی هەڵبژاردن، ئیشمان زۆر بووە و 24 کاتژمێر کاردەکەین، بۆ ئەوەی بە زووترین کات زۆرترین پۆستەر و وێنە ئامادە بکەین”.

“کاندید هەیە نیو ملیۆن دۆلاری تەنیا بۆ دروستکردنی پۆستەرەکانی خەرج کردووە و هەشە تەنیا پێنج ملیۆن دینار خەرج دەکات”، رابەر قاسم وای وت.

ئاماژەی بەوەشکرد، نرخی چاپکردنی پۆستەر دابەزیوە و لە ئێستادا هەر مەترێک پۆستەر بە سێ بۆ چوار هەزار دینار چاپ دەکرێت.

بڕیارە هەڵبژاردنی پەرلەمانی عێراق 11ـی مانگی داهاتوو بەڕێوەبچێت و لە کاتژمێر 12ـی بەرەبەیانی رۆژی هەینی 3ـی ئەم مانگەشەوە بانگەشەی هەڵبژاردن دەستیپێکردووە.

پێداچوونەوە؛ شۆڕش قادری