سبەی کۆتا وادەیە بۆ پڕکردنەوەی فۆرمی زانکۆلاین

ژووری هەواڵ

سبەی 30.9.2025  کۆتا وادەیە بۆ دەرچووانی پۆلی 12ـی ئامادەیی تا سوودمەندبن لە پڕکردنەوەی فۆڕمی زانکۆلاین.

ئەمڕۆ دووشەممە 29.9.2025  وتەبێژی وەزارەتی خوێندنی باڵا و توێژینەوەی زانستی عەباس ئەکرەم  بە 964ی راگەیاند: سبەی کۆتا وادەیە بۆ پڕکردنەوەی فۆرمی زانکۆلاین و خوێندکاران دەتوانن سوودمەند بن.

هەروەها سەبارەت بە درێژکردنەوەی وادەی پڕکردنەوەی فۆرمەکەش دەڵێت، تا ئێستا بڕیار نەدراوە وادەکە درێژ بکرێتەوە و لە ئەگەری هەر گۆڕانکارییەک هەمووان ئاگادار دەکرێنەوە.

پڕکردنەوەی فۆڕمی زانکۆلاین لە هەرێمی کوردستان لە رێکەوتی 23.9.2025 دەستیپێکرد و بڕیارە سبەی کۆتایی بێت.

تەنیا ئەمساڵ رێژەی دەرچوونی خوێندکارانی پۆلی 12، زیاتر لە 50% بوو، واتا لە کۆی 117 هەزار قوتابی، نزیکەی 60 هەزاریان دەرچوون، وتەبێژی خوێندنی باڵاش وتی، ئامادەیی تەواومان هەیە بۆ وەرگرتنی خوێندکاران لە  سەرانسەری زانکۆ و پەیمانگاکان.