“تا دوا ساتەکانی گەمارۆدان و پەلاماردان ئاگاداری شەڕەکەی لالەزار نەبووین”

شۆڕش قادری

سەرۆکایەتی حکومەتی هەرێم دەڵێت، تا دوا ساتەکانی گەمارۆدان و پەلاماردان، ئاگاداری شەڕەکەی لالەزار نەبوون، داوایش دەکات، یاسا ببێتە جێگرەوەی بڕیاری حزبی و توندوتیژی، بۆ ئەوەی چیتر شەڕ و ئاژاوە، سەقاگیری کوردستان نەخاتە مەترسییەوە.

نووسینگەی سەرۆکی حکومەتی هەرێمی کوردستان لە راگەیەنراوێکدا بڵاویکردەوە، “هێرشی دوێنێ شەوی سەر لالەزار لە لایەن هێزەکانی ینک ئەنجام دراوە و کێشەیەکی نێوان ینک و بەرەی گەل بووە و سەرۆکایەتی حکومەتی هەرێم ئاگادار نەبووە تا دوا ساتەکانی گەمارۆدان و پەلاماردان.”

ئاماژە بەوەشکراوە، سەرەڕای هەوڵی زۆری سەرۆکی حکومەت بۆ ئەوەی شەڕ و پێکدادان روو نەدات، بەڵام دواجار هێرشەکە ئەنجام درا و کوژرا و برینداری لێ کەوتەوە.

نووسینگەی سەرۆکی حکومەت راشیگەیاندووە، “زۆر نیگەران و دڵگرانین بەو رووداوە و ئێستاش، پێویستە یاسا ببێتە جێگرەوەی بڕیاری حزبی و توندوتیژی و چیتر شەڕ و ئاژاوە، سەقاگیری هەرێمی کوردستان نەخاتە مەترسییەوە.