بەهۆی تامەکەیەوە بووەتە دیاریی گەشتیارانی رێگای کەرکوک - بەغدا
خاڵس بە 70 جۆر خورما بازاڕەکانی عێراق و چوار وڵاتی دیکەی پڕکردووە
سیروان خورشید – خورماتوو
قەزای خاڵس لە پارێزگای دیالە، کە بە “شاری خورما” لەسەر ئاستی عێراق ناسراوە، بەشێکی زۆری رووبەرەکەی بە دار خورما داپۆشراوە و بەرهەمەکەی هەناردەی زۆربەی پارێزگاکانی عێراق و هەرێمی کوردستانیش دەکرێت.
لە وەرزی پێگەیشتندا، خورماکان راستەوخۆ دەخرێنە بازاڕەوە، کە زیاتر لە 70 جۆری جیاوازی هەیە، بەناوبانگترین جۆرەکانی بریتین لە “بەکاوی، بەرحی، تبەرزەل، و خەزراوی” کە بە باشترینەکانی عێراق دادەنرێن.
ناوبانگی خورمای خاڵس تەنها ناوخۆیی نییە، بەڵکو هەناردەی وڵاتانی وەک تورکیا، دوبەی، عومان و هیندستانیش دەکرێت.
تام و ناوبانگی خورمای خاڵس وایکردووە، ئەو گەشتیارانەی بە رێگای کەرکوک – بەغدادا تێدەپەڕن، وەک خواردنێکی سەرەکی تامی بکەن و وەک دیارییەک بۆ ئازیزانیان بیکڕنەوە.
پێداچوونەوە: ژێوار خدر