کاریگەری خۆڵبارین دەگات بە ئاسمانی سێ ناوچە

ئەحمەد مستەفا

پێشبینی دەکرێ لە چەند کاتژمێری داهاتوودا ئەگەری کاریگەری شەپۆڵێکی خۆلبارین ڕوو لە ناوچەکانی بەشێک لە ئیدارەی گەرمیان و سنووری باشووری پارێزگای هەولێر و بەشێک لە پارێزگای کەرکوک بکات.

ئەمە پێشبینی بەڕێوەبەرایەتی گشتی کەشناسی و بوومەلەرزەزانی هەرێمی کوردستانە.

ئەو بەڕێوەبەرایەتییە لە راگەیەندراوێکدا ئەمڕۆ شەممە 16.8.2025 باسی لەوەکردووە، کاریگەری ئەو خۆڵبارینە لە بەشەکانی باکووری رۆژئاوای عێراق سەرچاوەی گرتووە و پێشبنی دەکرێ کاریگەرییەکەی بۆ ماوەی چەند کاتژمێریک بمێنێتەوە لەسەر ئەو ناوچانە.

ئەوە لە کاتێکدا، بەپێى پێشبینییەکانى کەشناسى، خەریکە وردە وردە گەرما بەهێزەکە تێکدەشکێ و پلەکانى گەرما یەک بۆ دوو پلەى تریش دادەبەزن، ئەمڕۆ شەممە 16.8.2025، کەشناسى هەرێم پێشبینى کردووە پلەکانى گەرما 1 تا 2 پلەى سیلیزى داببەزن.

حاجى ئۆمەران فێنکترین ناوچەى کوردستانە و پلەکانى گەرما لەخوار 30 پلەى سیلیزییە، گەرمیانیش بە 46 پلەى سیلیزى گەرمترینە.

لەبارەى کەشى سبەینێ یەکشەممەش، بەهەمان شێوە ئاسمان ساماڵ دەبێت بۆ زۆرێک لە ناوچەکانی هەرێمی کوردستان و پلەکانى گەرماش نزیکن لە تۆمارکراوەکانى ئەمڕۆ.