بوومەلەرزە کرێی خانووی 100٪ زیادکردووە
964+
پێشەوا محەمەد – سلێمانی
نەک هەر تەنیا لەو شارانەی بوومەلەرزە گرتیانەوە کرێی خانوو بەڕێژەی 100٪ بەرز بووەتەوە، بەڵکو کاریگەری لەسەر ئیستەنبوڵ و ئەنقەرەش دروستکردووە و لەوێش بەڕێژەی 20٪ گران بووە.
دوای بوومەلەرزە وێرانەکەرەکەی 6ـی ئەم مانگە کە 11 شاری تورکیا و باکووری کوردستانی گرتەوە کەسەرووی ملیۆنێک و 250 هەزار یەکەی نیشتەجێبوون بەهۆیەوە رووخاون و داتەپیون و سەرووی ملیۆنێک و 500 هەزار کەسیش ئاوارە بوون.
فاروق قەرەداغی، بەڕێوەبەری کۆمپانیای ئاسمان بۆ کاری عەقارات لەشاری ئیستەنبوڵ بە تۆڕی964ی راگەیاند: بەهۆی زۆری خواست لەسەر خانووی کرێ لەو ناوچانەی بوومەلەرزە گرتنیەوە، کرێی خانوو و شوقە لە چوار هەزار و 500 هەزار لیرە بۆ 10 هەزار لیرە زیادی کردووە.
دەشڵێت: بەهۆی رووخانی باڵەخانە کۆنەکان لە ئیستەنبووڵ و ئەنقەرە خواست لەسەر گرتنی شوقەی باڵەخانە نوێیەکان زیادی کردووە و ئەمەش وایکردووە کرێی بەڕێژەی 20% بەرز ببێتەوە.
پێداچوونەوە: فەرمان سادق