كەسایەتییەكی نزیک لە دەسەڵاتدارانی ئێران لە رێگای 964وە وەڵامی ئەمریكا دەداتەوە

محەمەد فاتیح

ئەمیر موسەوی، كە بە كەسایەتییەكی نزیك لە دەسەڵاتدارانی ئێران دەناسرێت، لە رێگای 964وە وەڵامی تێڕوانین و ئامۆژگارییەكانی ئەمریكا بۆ عێراق دەداتەوە، هاوكات دەڵێت، تاران لەسەر هاوكاریكردنی عێراق سوورە.

ئەمیر موسەوی، بەڕێوەبەری سەنتەری توێژینەوە ستراتیژییەکان و پەیوەندییە نێودەوڵەتییەکان لە تاران و راوێژكاری پێشوو لە سەرۆكایەتی كۆماری ئێران، بە كەسایەتییەكی نزیك لە دەسەڵاتدارانی ئێرانەوە ناسراوە، ئەو لە رێگای 964وە قسە بۆ بينەر و خوێنەری كوردی دەكات و پشتگیری تاران بۆ عێراق دووپات دەكاتەوە.

موسەوی، كە پێشتر لە باڵیۆزخانەی ئێران لە جەزائیر كاری كردووە، زۆرجار لە میدیا عەرەبییەكان دەردەكەوێت، ئەمجارە راشكاوانە قسەی بۆ 964 كرد و پێی وایە، كۆماری ئیسلامی ئێران هەژموونی بەسەر عێراقەوە نییە، بەڵكو هاوكاری لە نێوانیاندا هەیە.

هەروەها ئەو وەك ئێرانییەك دەڵێت، “لە قەیران و كارەساتەكاندا دەستی یارمەتیمان بۆ گەلی عێراق درێژكردووە، كە دوژمنی هەردوو وڵاتەكە بەسەریاندا سەپاندوویانە، تەنیا ئێران پشت و پەنایان بووە و بەردەوامیش دەبین لە هاوكاریكردنیان”.

“تێكەڵاوییەك لە رووی كۆمەڵایەتی و ئایینی و ئەمنی و سیاسییەوە، لە نێوان هەردوو گەلی عێراق و ئێران دا هەیە، ئەوانەشی هەژموونیان بەسەر عێراقدا هەیە، ئەمریكا و بەریتانیا و توركیان، لەگەڵ هەندێك لە وڵاتانی كەنداو”، ئەمیر موسەوی وادەڵێت.

964 پرسیاری زۆری ئاراستەی موسەوی كرد، بەڵام ئەو بە كورتی وەڵامی هەندێكیانی دایەوە، دەشڵێت، ئێران هەژموونی بەسەر عێراقدا نییە، بەڵكو ئێران پاڵپشت و پشتیوان و پارێزەری عێراقە و بەڵگەكانیش زۆرن.

ئەو قسانەی ئەمیر موسەوی بۆ 964، لە كاتێكدایە و وەك وەڵامێكە بۆ ستیڤن ڤاگن، کاربەڕێکەری باڵیۆزخانەی ئەمریکا لە عێراق، كە هۆشداریی دابووە بەرپرسانی باڵای عێراق، لە دژی پرۆژەیاسای حەشدی شەعبی بوەستنەوە و لەمبارەیەوە وتی، تێپەڕاندنی یاساکە بەهێزکردنی هەژموونی ئێرانە و هەڕەشەیە بۆ سەروەریی خاکی عێراق.