لەسەر داربڕین پێنج کەس لە ماوەت دەستگیر کران – وێنە؛ پۆلیسی دارستان و ژینگەی سلێمانی
"ویستوویانە ناوچەیەکی گەشتیاری دروست بکەن"
پێنج کەس ژمارەیەک شۆڕەبی لاو و بەتەمەنیان بڕییەوە؛ دەستگیر کران
شۆڕش قادری
لە قەزای ماوەتـی سنووری شارباژێر لە پارێزگای سلێمانی، پێنج کەس بۆ بەرژەوەندی کەسیی خۆیان و دروستکردنی ناوچەیەکەی گەشتیاری، ژمارەیەک شۆڕەبی لاو و بەتەمەنیان بڕییەوە، پۆلیسی دارستان و ژینگە پێیزانی، قۆڵبەستی کردن.
هێمن کەمەرخان وتەبێژی پۆلیسی دارستان و ژینگەی سلێمانی بە 964ـی وت، لە ئەنجامی گەڕانی مەفرەزەیەکی هاوبەشی نێوان بەشی پۆلیسی دارستان و ژینگەی ماوەت و یاریدەدەرێتی ئاسایشی قەزاکە، توانراوە پێنج هاوڵاتی بەتۆمەتی داربڕین لە سنوری گوندی یەردەشین دەستگیر بکرێن .
لە لێکۆڵینەوەکاندا دەرکەوتووە کە ئەو سەرپێچیکارانە هەستاون بەبڕین و شکاندنی ژمارەیەک دار لەجۆری بی، لەگەڵ ئەوەشدا زەوییان بەشێوەی زیادەڕۆیی تەخت کردووە”، کەمەرخان وای وت.
ئاماژەی بەوەشکرد، ئەو کەسانە ویستوویانە بەبێ مۆڵەت ناوچەیەکی گەشتیاری دروست بکەن.
وتەبێژی پۆلیسی دارستان و ژینگەی سلێمانی وتیشی، پەڕاوی لێکۆڵینەوەی بۆ ئەو کەیسە رێکخراوە و بۆ وەرگرتنی رێکاری یاسایی رادەستی دادوەری لێکۆڵینەوە کراوە.
