هادی جەلۆ مەرعی سەرۆکی کۆمەڵەی شرۆڤەکارانی سیاسی عێراقی
سەرۆکی کۆمەڵەی شرۆڤەکارانی عێراق بۆ 964
عێراق خاوەن سەروەری خۆی نییە و ناتوانێت ئاسمان و خاكى خۆی بپارێزێت
964+
محەمەد فاتیح
سەرۆکی کۆمەڵەی شرۆڤەکارانی سیاسی عێراقی پێی وایە، عێراق ئاسمانی خۆی بۆ ناپارێزرێت.
هادی جەلۆ مەرعی، سەرۆکی کۆمەڵەی شرۆڤەکارانی سیاسی بە 964ـى وت، “عێراق خاوەن سەروەری خۆی نییە و ناتوانێت ئاسمانی خۆی كۆنتڕۆڵ بكات و وەك دەبینین درۆنی ئێرانی و فڕۆكەی ئیسرائیلى بەسەر ئاسمانەكەیدا هاتوچۆ دەكەن، بەبێ ئەوەی دەسەڵاتی ئەوەی هەبێت رێگریان لێ بكات”.
“عێراق ناتوانێت رێگری لە فڕۆكەكانی ئیسرائیل بكات كە سنووری ئاسمانەكەی دەبەزێنن و هیچی بۆ ناكرێت بەرامبەر بەزاندنی ئاسمانەكەی لەلایەن ئیسرائیل و ئێرانەوە و لەكاتی جەنگدا دەستەواژەی سەروەری بوونی نامێنێت”، هادی جەلۆ مەرعی واى وت.
دەشڵێت، “بەلای كەمەوە عێراق 40 ساڵە توركیای دەستكراوە كردووە لەوەی سنوورەكانی پێشێل بكات و بە دەیان كیلۆ مەتر بێتە نێو خاكی عێراقەوە، ئەمە وەك ئەوە وایە یەكێك پێت بڵێت، من ماڵەكەت دەدزم ئەگەر رازیت سوپاست دەكەم ئەگەر رازیش نابیت ماڵەكەشت دەدزم و فیشەكێكیش دەنێم بە ناوچەوانتەوە، واتا عێراق خاوەن سەروەری نییە”.
جگە لە ئاسمان، لە رێگەی وشكانییەوە وڵاتانی دراوسێ سنووری عێراقیان بەزاندووە و ناو بەناوە لە لایەن ئێران و توركیاوە بۆردومان دەكرێت، بە تایبەتی لە ناوچە سنوورییەكانی هەرێمی كوردستان.